Fr. Carmelo O. Diola, SSL
Mao Diay
Binasi sa Buhat 8:5-8, 14-17; Salmo 66; 1 Pedro 3:15-18; ug Juan 14:15-21
“Ug akong pangayuon sa Amahan, ug hatagan kamo niya og laing pang Manlalaban nga magauban kaninyo kanunay, ang Espiritu sa kamatuoran…”
Niadtong milabay nga Huwebes, mitambong ako sa graduation sa usa ka bantugan kaayo nga eskuwelahan. Kapin kon kulang pito ka libo ang mga natapos. Gihimo ang maong seremonyas sa gawas. Maayo na lang wala moulan.
Misugod ang seremonyas pinaagi sa pagmartsa sa mga motapos padulong sa ilang mga lingkoranan, dinuyogan sa huni nga pangmartsa. Mabulokon kaayo ang mga toga. Sa nakaabot na sila sa ilang mga luna, mitindog ang usa ka may makataha-og barog nga lalaki nga naggunit og dako nga baston ug, sa makusog nga tinog, milanog: “…Bukas na ang atong miting…” Namakpak ang mga nanambong nga mikabig sa mga ginikanan, igsoon, ug mga higala sa mitapos. Napadayon na usab ang usa ka karaang tradisyon.
Wala giusausa ang mga natapos kondili gidungan ang mga kolehiyo nga nahilakip sa unibersidad. Mitindog usa ang dakodako sa maong kolehiyo ug ang mga hingtongdan nga mga estudyante. Hatagan sa dakodako og pasiuna ang ilang pundok. Unya motubag ang presidente sa unibersidad. Nindot kaayong paminawon ang maong mga tabag. Mubo ug haom kaayo.
Ngadto, pananglit, sa mga tunghaan sa abogasiya, miingon ang babayeng presidente nga sila andam na nga manggilabot sa pagmugna og mga “makinaadmanong pagpugong nga gikinahanglan alang sa kagawasan.”Human sa dako nga panaghugpong, ang mga nagkalainlaing kolehiyo miadto sa ilang mga lugar ug didto gitawag og tagsatagsa ang mga natapos.
Human sa paniudto, mitapok na usab ang tibuok unibersidad sa gipundokan sa buntag. Gitapos kini sa pagpamulong sa pinasidunggang dinapit nga miingon: “Ang kadako sa inyong mga damgo kinahanglan molapas sa inyong kasamtangang kapasidad sa pagtuman niini. Kon ang inyong mga damgo wala makahadlok kaninyo, dili pa sila dako. Kon mosugod kamo og gamay nga damgo, basig wala nay mahabilin niini inigkatuman na niini kay diha sa dalan, sulayan sa kinabuhi ang inyong mga damgo ug palisodlisoran kamo…”
Bitaw nalingaw kaayo ko sa pagsaksi sa graduation didto sa Harvard University sa Estados Unidos. Gisugdan maong eskuwelahan sa tuig 1636 “aron pagpalambo sa Kaalam ug pagpadayon niini alang sa umaabot nga Panahon.”
Usa ka siplat-tan-aw sa mga gipanghatagan og mga pahinungod kon honorary degrees magpaila sa pagkabanggiitan sa maong unibersidad. May tawo nga maoy imbentor sa gitawag nga world wide web kon www, ang mga unang letra sa email address. Didto pod si Placido Domingo, usa ka ilado kaayong mangangawit sa opera. May chemist nga nakadaog Nobel prize, ug uban pa.
May usa ka Linatin nga pulong nga kanunayng makit-an didto sa Harvard niadtong adlawa: Veritas kon kamatuoran. Daghan ang nahatag na sa maong eskuwelahan sa atong kalibutan pinaagi sa pag-umol sa labing mahinungdanon nga kapanguhaan kon resource nga mao ang tawo sa mga nagkalainlaing natad sa kinabuhi sa tawo.
Sa pamaagi nga misteryoso ug kon subayon gayod ang kasaysayan sa maong eskuwelahan – hinumduman nato nga mga Kristohanon ang nagsugod niini – makaingong kita nga gipaluyohan kini sa Langitnong Manlalaban bisan pa og matag karon ug unya may mga panghunahuna nga wala mohaom sa laraw sa Dios.
Kinabuhi ang kamatuoran.
(Wala kini napagawas nga lindog kagahapon.--Editor)