DI mominos 17 ka mga tawo ang nangaangol dihang nalimbuwad ang trak de karga nga Isuzu Forward sa South Coastal Road sa South Road Properties (SCR-SRP), siyudad sa Sugbo, alas 3:30 kagahapon sa kaadlawon.
Ang 6-wheeler nga trak nga nagdala sa plakang GTL-265 puno kaayo sa mga kargamentong utanon, prutas ug ubang lagutmon nga itumod sa Carbon Market gikan sa habagatan sa lalawigan sa Sugbo.
Ang mga biktima pulos negusyante ug pipila ka mga mag-uuma nga nagpatong lang sa ibabaw sa mga produkto sa umahan dihang nikariling ang de karga sa naasoy nga dapit.
Ang mga nangaangol giila sa City Traffic Operation Management (Citom) naglakip sa magtiayong Alfredo ug Trinidad Batucan, pulos nag-edad og 53; Brehido, 53, ug Dioscora Labrador; Theodorico Marayan, 53; Maria Elena Cane, 50; Danilo, 40 ug Milba Balbero; Merly Cane, ang tanan pulos taga lungsod sa Asturias.
Laing mga biktima mao sila si Jesse Cataluna, 17; Joramil Basillote, 20; Claudia Son, 60; Analie Opendo, 58; Eunice Opendo, 4-anyos; Narsila Papaya ; Torsisyos Biay, 15, pulos taga lungsod sa Balamban ug laing usa nga wa makuha ang ngan.
Si SPO3 Nelson Jayme, imbestigador sa trapiko, nagkanayon nga samtang nagsubay ang trak de karga sa taytayan sa SRP, wa mabantayi sa drayber nga si Narciso Millar, 48, taga lungsod sa Dumanjug, nilatay na ang duha ka ligid sa tuo nga bahin ngadto sa gutter.
Ang sakyanan nibangga sa railings ug wa na makontrolar ni Millar ang manobela nga nag-ikis-ikis na ang dagan hinungdan sa pagkatumba niini sa wang bahin nga niresulta sa pagkaangol sa mga biktima.
Hinuon, ang mga manumoray sa Carbon Market daling gidala sa Cebu City Medical Center (CCMC) pinaagi sa Emergency Rescue Unit Foundation (Eruf).
Ang Citom nagkanayon way seryusong nangaangol sa mga biktima gumikan sa maong disgrasya.