ARON mas paspas ang pagsulbad sa kaso, mitanyag na karon og ganting salapi ang pamilyang Bangoy sa kinsa mang indibidwal nga makatabang kanila, makatudlo sa mga tawong misuway pagpatay kang Atty. Cresdan Bangoy sa nakalabayng Hunyo 3.
Nasayran nga sa nakalabayng Biyernes gipusil sa wala mailhing mamumuno si Atty. Bangoy, 39, minyo ug nagpuyo sa Bell Air, Barangay Sasa, ning siyudad.
Subay sa imbestigasyon nga gihimo sa Sasa Police Station, nahitabo ang pagpamusil samtang padulong na mosulod sa iyang balay ang biktima.
Nasayran nga gikan pa sa iyang opisina si Bangoy apan gisundan siya sa wa mailhang lalaki nga nagsakay sa Maligaya Taxi.
Ang maong tawo milanit sa iyang armas dayon gipusil ang biktima duha ka higayon, diin human sa pagpamusil ang suspek dali sab nga misibat sakay sa taxi.
"The family Bangoy raised a money to those who can help them or tell them, makapagsumbong kun sino yung tao na involved," ni Atty. Bobbet Torreon, bag-ong napili nga Governor sa Integrated Bar of the Philippines (IBP) Eastern Mindanao sa Kapehan sa Dabaw, SM Mall kagahapon.
Sumala sa abogado di pa tino kun pila ang kantidad nga ihatag sa pamilya, hilabi na nga apil sab sa mohatag sa ilang suporta ang IBP members sa nagkadaiyang bahin sa nasud.
"I will go to Manila and asked yung ilang kasama natin. We are one in supporting Atty. Bangoy.
Bisan og way tino nga kantidad, apan gibutyag sa abogado nga anaa sa unom ngadto sa pito ka digits ang kantidad sa ihatag nga salapi.
Mihangyo si Torreon ngadto sa mga tawong may kapungot sa mga abogado nga kun may kaligutgot man sila sa mga nahisgutan, di ibutang sa ilang kamot ang hustisya, inay mopasaka og kaso o moreklamo.
"We are advocates your messengers so we should not be shut-up. Without law, order, anarchy will develop," ni Torreon.
Alang sa abogado nga bisan og anaa sa peligro ang ilang kinabuhi, apan niya pa, ginabuhat lamang nila ang ilang trabaho nga panalipdan ang ilang kliyente.
"Lawyers are just doing thier jobs, if duna moy hatred sa lawyers, talk us in a civil manner, you can air your side not to the point of killing the lawyers."
Sa kasamtangan nagpadayon pa ang imbestigasyon sa kaso ni Atty. Bangoy, diin hangtud karon di pa maestablisa sa kapulisan kun unsa ang motibo sa krimen.
Sumala ni P/Supt. Jose Carumba, Regional PIO sa Philippine National Police XI nga sa kasamtangan padayon sa pagpangita og dugang ebidensiya ang kapulisan alang sa hinanaling kasulbaran sa krimen.
"On going pa rin yung investigation sa kaso ni Atty. Bangoy, diin nagmando na si director Morente ngadto sa atong police personnels nga makig-coordinate gyud sa pamilya and other personalities nga who can helo solve the problem."
Giangkon sab ni Atty. Torreon nga subay sa gisulti kaniya ni Atty. Bangoy nga wala kini mahinumduman nga tawong naka-away o nakabangi nga posibleng rason nga gisuwayan sa paghunos ang iyang kinabuhi.
Dugang pahayag sa abogado nga bisan og unsa man kadautan o kabuotan ang usa ka abogado, way si bisan kinsa nga gitugutang mokutlo sa ilang kinabuhi, tungod may saktong proseso nga angayang subayon.
Sa imbestigasyon sa kapulisan ang suspek gilarawan nga 5'2" ang gitas-on ug nagsul-ob og blue nga t-shirt atol sa hitabo.
Samtang kagahapon malapuson sab nga nakuha ang bala sa lawas ni Atty. Bangoy, diin sa kasamtangan nagpa-alim na kini sud sa Davao Doctors Hospital. (Rhona O. Goc-ong)