NALAKIP ang Sugboanong si Dondon Hontiveros sa mga gipang-imbitar ni coach Tab Baldwin nga posibling maapil sa Gilas Pilipinas national team alang sa 2015 Fiba Asia championships.
Niadtong Miyerkules, ang beteranong Hontiveros uban sa iyang teammate sa Alaska Aces nga si Sonny Thoss, Terence Romeo sa Globalport, amateur standout Troy Rosario ug ang 43 anyos nga si Asi Taulava ang nagpakita sa Meralco gym alang sa light practice sa Gilas.
Hinuon giklaro sa mga opisyal sa Samahang Basketbol ng Pilipinas (SBP), nga wa pa gyuy official lineup ang malakip sa Gilas pool hangtod nga dili pa kini i-anunsyo karong Lunes.
Matod pa nga ang ensayo niadtong Miyerkules gipahigayon ni Baldwin alang sa mga prospect players nga gustong magpakondisyon permi.
Diha usab sila si Jayson Castro ug Ranidel de Ocampo sa Talk N’ Text, Gary David sa Meralco nga mga sakop nang daan sa Gilas team ubos ni coach Chot Reyes nga maoy runner-up sa 2013 Fiba Asia championship.
Ang laing prospect ug Sugboanon usab nga si Aldrech Ramos uban ni Romeo diha usab apan wa kini moapil sa ensayo tungod ka sayo pa niini nakapraktis kini sa Manila Teams alang sa Fiba 3x3 World Tour Manila Masters.