KUNG makadungog kita og organic farms, unang mosud sa atong huna-huna nga kini nahimutang sa rural area o sa bukid.
Apan si Dr. Rodelio Dalisay nakadesidar nga ibutang ang iyang organic farm sa kinapusurang bahin ning siyudad.
Nahimutang sa Regina Dalisay Compound, likod sa Abreeza Mall, Bajada ning siyudad, gi-convert ni Dalisay ang rest house sa iyang apuhan nga iyang nakuha niadtong 2007 sa usa ka organic urban garden.
Niya pa, usa lamang ka lingaw-lingaw ang organic farming kaniya dihang gisugdan niya niadtong 2012.
Gisugdan niya sa gamay nga paso, sa hinay-hinay gipalambo niya ang iyang organic urban farm.
Nagsugod siyag pananum sa kamatis, letsugas, cauliflower, ug brocolli, nga di kaayo komon dinhi.
"I started with a small plot because when I go to the groceries, I cannot find organic produce and then the trend of organic vegetables started at that time when I left the United States (US), so I started my own," ni Dalisay.
"From one plot, then it became two, three, then four until I expanded it."
Enero 2014, gibuksan sa publiko ang Wynward Organic Vegetable Garden.
Gipromotar ni Dalisay ang iyang farm pinaagi sa official Facebook page (facebook.com/orgveggies).
Bag-uhay lamang gisugdan na sab niya og pananum sa zucchinis, kalette, ug sage.
Makita sab sa iyang farm ang tomatillos, sugarbeets, salad dandelions, swiss chards, ug dark cherry tomatoes.
Si Dalisay nga naghupot sa doctorate degree sa Plant Pathology gikan sa The University of Kentucky (UoK) sa Lexington, wa lamang na-enjoy sa urban organic farming apan isip usa sab ka chef.
Gamit ang skills ug training niya isip chef dihang didto pa siya sa US, nagbukas siya og bistro sa farm nga nagtanyag og healthy meals, nag-feature sa mga preskong harvest nga gulay gikan sa farm.
Angkon ni Dalisay nga di sayon ang organic farming tungod gikinahanglan nimong atimanon og tagsa-tagsa ang matag tanum.
Siya sab ang nagahimo siyang kaugalingong organic pest control techniques sama sa pagtabon sa prutas og newspaper, paggamit og marigold isip deterrents.
Aron mapromotar pa ang organic urban farming sa Dabawenyos, bukas ang Wynward Organic Vegetable Garden sa mga mag-uuma, estudyante ug indibidwal nga buot makat-on.
"Poople are now opening their eyes to go organic."
Pipila sa grupo nga nakaduaw sa organic farm mao ang Kiddie Chefs sa Italiannis summer camps, farmers gikan Barangay Tagbaobo, Island Garden City of Samal, estudyante gikan Ateneo de Davao University, magtutungha sa Southeastern Philippines, ug uban pa.
Na-feature na sab si Dalisay ug iyang farm sa multi-awarded television progam Agri Tayo Dito sa ABS-CBN.
Tungod sa iyang adbokasiya, ang Wynward Organic Vegetable Garden nahimong finalist sa 3rd Lunhaw Awards, nga gihimo Marso 13 ning tuig.
Ang farm midawat sab og special award sa Urban Organic Vegetable Gardening.