Henry Mañus
179 Basak-Iba, Lapu-Lapu City
BUNTAG. Huyhoy ang abaga ni Kardo nga migawas sa iyang lawak. Nagpanghapyod siya sa iyang mga mata ug nanghinuy-ab nga daw nakulangan sa tulog. Unya milakang siya paingon sa kusina nga nagbarag-barag.
“Unsay nahitabo nimo, Dong Kardo, nga nagluya ka man?” gisukna siya ni Mama Sita niya nga nag-andam sa ilang pamahaw.
“Nahadlok ko sa akong damgo, Ma,” tubag ni Kardo nga nagkutaw og kape.
“Nahadlok ka sa damgo nga bunga ra man na sa katulugon?” ni Mama Sita nga ginuntan og katawa nga mipawalis sa busngion niyang baba.
Mihilom si Kardo. Naglibog siya. Iya man god nga nahunahunaan ang libro nga hubad kuno sa damgo nga iyang nabasahan kagahapon didto sa library sa ilang eskuylahan. May gipangita siyang libro niadtong higayuna dihang iyang nasiplatan ang libro nga ‘Hubad sa mga Damgo.’ Iya kining gikuha ug gibasa.
Mitan-aw si Kardo sa iyang inahan nga padayong miandam sa ilang pagkaon alang sa pamahaw. Gitutokan niya kini. Makahuloganon. Nabantayan kini ni Mama Sita.
“Unsa ba gyud kanang nadamgohan mo, ha?” mabalak-ong nangutana si Mama Sita.
“Ikaw maoy nadamgohan nako, Ma!” ni Kardo kinsa miduol sa nahimutangan sa iyang inahan.
“K-Kay naunsa man diay ko sa imong damgo, Dong?”
“Naminyo kuno kag usab, Ma. Ug Amerkano kuno ang imong naminyoan!”
“Kanindot god diay sa imong damgo, Dong Kardo! Sa pangidaron kong singkuwenta anyos na, makakaplag pa diay kog ka-love team. Ha-ha-ha!” mibahakhak og katawa si Mama Sita nga nakapatay-og sa iyang mga abaga. Hilabihan niyang lipaya. Kay kinsa bay di bation og kalipay nga sa sulod sa napulo ka tuig na niyang pagka biyuda, kay namatay man si Fredo nga iyang bana dihang nahulog sa sanggutan, makakaplag pa diay siyag lalake? Ug Kano pa gayud.
Nanghupaw si Kardo. Unya, gitutokan na sab niya ang iyang inahan. “Lain man god ang kahulogan sa damgo nga akong nabasahan kagahapon didto sa library sa among eskuylahan, Ma. Matod pa sa libro, balit-ad kuno ang hubad sa damgo. Nga sa ato pa, kay nagdamgo man ko nga makakaplag kag laing lalake, ang hubad niini… matigulang ka na lang mag-inusara!”
Milagubo ang sulod sa kusina dihang nahagsa ang bug-at nga butang. Gidali ni Kardo pagsapupo si Mama Sita niya kinsa mikalit lang og katumba human mabati ang iyang gipamulong. Misinggit si Kardo nga nangayog pakitabang sa ilang mga silingan dihang iyang nabatyagan nga wala na mopitik ang pulso sa pinangga niya inahan nga may sakit sa kasingkasing.(KATAPUSAN)