GILAUMAN nga moabot karong adlawa dinhi sa siyudad ang team nga ipadala sa Department of Interior and Local Government (DILG) nga maoy mag-imbestiga sa nahitabong pagpanumbag ni Mayor Sara Duterte ngadto kang Sheriff Abe Andres.
Ang team gitahasan ni DILG secretary Jessie Robredo nga sutaon kung unsa ang tinuod nga nahitabo niadtong Biyernes atol sa gitakdang demolisyon didto sa Soliman, Barangay Kapitan Tomas Monteverde Sr., siyudad sa Davao.
Gawas sa DILG, maglusad sab og imbestigasyon ang Commission on Human Rights (CHR) bahin sa maong hitabo aron masuta kung dunay paglapas sa tawhanong katungod si Duterte.
"Naa nakoy constituted nga investigation team to look into the punching incident involving the city mayor and a sheriff," ni CHR director Alberto Sipaco Jr. dihang gipakisayran pinaagi sa telepono kagahapon sa Superbalita.
Si Sipaco nagbutyag nga bisan dunay ilusad nga imbestigasyon ang DILG, apan ang CHR magpadayon sab sa ilang kaugalingon nga imbestigasyon.
"The CHR team shall proceed independently with its investigation of the case despite the one be conducted by the DILG. Neither shall we depend in whole or in part on the findings or conclusion of the DILG fact-finding team," pahayag ni Sipaco pinaagi sa mensahe sa text.
Ang maong opisyal nagkanayon nga ang ilang imbestigasyon mahimong parallel gihimo sa DILG.
"The investigation to be conducted by CHR XI (Davao Region) is parallel to that of the DILG," panapos ni Sipaco.
Aron mahatagan og higayon nga makaimbestiga ang DILG, gibutyag ni Mayor Duterte nga mag-leave siya sa trabaho sud sa lima ka adlaw nga magsugod karong Hulyo 7 hangtud Hulyo 11.
Rason sa mayor sa pagbiya una sa trabaho mao nga malikayan ang istorya nga ma-impluwensiyahan niya ang mga tawong mag-imbestiga sa kaso. (Alger Dura ug Rhona O. Goc-ong)