MISAMOT kadaghan ang mga tawo nga misuporta kang Mayor Sara Duterte kinsa nalambigit karon sa kontrobersiya tungod sa pagpanumbag kang sheriff Abe Andres niadtong Biyernes didto sa Soliman, Barangay Kapitan Tomas Monteverde Sr., siyudad sa Davao.
Ang labing uwahing mipadayag sa ilang suporta sa mayor mao ang mga sakop sa Councilor's League of the Philippines (CLP) Davao City Chapter.
Ang maong grupo miatubang sa mga sakop sa media kagahapon sa usa ka press conference aron irehistro ang ilang suporta sa mayor nga giimbestigahan karon sa Department of Interior and Local Government (DILG) main office.
Ang mayor giimbestigahan aron sutaon kung dunay kapasikaran nga pasakaan siya og kasong administratibo tungod sa pagsumbag kang Andres.
Si Barangay Mintal Kagawad Benedict Adan, spokesperson sa grupo sa mga konsehal, nagbutyag nga saludo sila sa gihimo sa mayor sanglit nagpakita lamang kadto nga andam nga molaban ang mayor ngadto sa mga kabus nga Dabawenyo.
Gipadayag sa mga barangay kagawad gikan sa 182 ka mga barangay nga way laing mapakataktak sa pwesto sa mayor kun di ang mga Dabawenyo.
"No one can remove Mayor Inday Sara Duterte from office except the people of Davao and it will never happen because, we, the BCLP Davao City Chapter and all DavaoeƱos 100 percent supports the Mayor," hiniusang pahayag sa mga barangay kagawad kagahapon.
Sa laing bahin, isip pagsuporta sa mayor, nagsul-ob sab og green nga T-shirt ang mga empleyado sa city hall samtang gipanghiktan og kolor green nga ribbon ang mga opisina, ug ubang dapit sa down town area sa siyudad.
Mga konsehal, kapitan sa tulo ka distrito misuporta sab sa mayor pinaagi sa pagsulti nga ilang paluyohan ang mayor sa giatubang niya nga kontrobersiya.
Gawas sa mga opisyales sa siyudad, nagpadayag sab ang mga negusiyante sa ilang suporta pinaagi sa Davao City Chamber of Commerce and Industry Incorporated (DCCCII). (AD)