WALA gyud long-i sa mga reporters, columnists ug mga editorial sa mga national newspapers ang nahitabo sa atong dakbayan Davao bahin sa pagpangulata ni Davao City Mayor Inday Sara Duterte kang sheriff Abe Andres sa wala madayon nga demolisyon sa mga squatters sa Soliman, Barangay Kapitan Tomas Monteverde, Agdao ning atong siyudad.
Sa gula sa Philippine Daily Inquirer, Hulyo 11, 2011, gibanatan ni Armando Doronila ang pamilya Duterte pinaagi sa iyang caption nga nagkanayon, "Assault on sheriff is abuse of power by Dutertes". Sakit gyud hinuon basahon ang maong banat kay gikompara ni Doronila ang mga Duterte sa mga Ampatuan nga mga haring gangis sa probinsiya sa Maguindanao.
Sumala sa maong magsusulat nga gigamit daw sa mga Duterte ang mga Dabawenyo pinaagi sa usa ka solidarity rally aron pangunahan daw ang imbestigasyon sa national nga luyo sa pagpangulata ni Mayor Sara kang Andres suportado pa gihapon siya sa mga katawhan sa Davao.
Sa atong paglantaw sa maong isyu, mora'g wala mahitukma sa probinsiya sa Maguindanao ang comparison tali sa Duterte family ug sa Ampatuan family kay ang mga Ampatuan gikahadlokan ug gilikayan sa katawhan sa tibuok probinsiya samtang mga pamilyang Duterte gisuportahan sa katawhan sa Davao.
Unsa pa, matud ni Doronila, dangerous doctrine daw tungod kay inay nga ang nangulata maoy mangayo og pasaylo, ang gikulata naman hinuon ang papangayuon og pasaylo sa nagkulata niya.
Kining tanan pulos mga opinyon sa mga kolumnista ug mga magsusulat basi sa ilang kaugalingong imbestigasyon. Hinuon, sa atong kaugalingong panglantaw, dili man "conclusive" o pagpanghusga sa maong hitabo.
Alang sa atong mga public opisyal, ayaw mo paglaum nga ang tanang opinion anha pabor ninyo. Ang importante dili ka "i-trial by publicity" ubos sa usa ka domokrasyang nasud. May kagawasan kita sa pagpagawas sa atong tagsa-tagsa ka mga opinyon nga gigarantiya sa atong Konstitusyon.
Kasong "grave misconduct" ang unang gi-atubang sa atong Mayor sa Davao nga kon walay suwerte matangtang siya sa pagka-mayor sa atong dakbayan. Pero nag-agad kini sa imbestigasyon sa Department of Interior and Local Government (DILG) ug kining tanan mosangko kang P-Noy, may sagol nga politika di ba?
Ang pinakagrabe ang "disbarment" kay wala na kini sagol politika. Wala man tuod moreklamo si Andres pero ang confederation sa mga sheriff sa tibuok Pilipinas maoy nag-file og kaso ug usa ka Abogado Fernando Perito nagpetisyon usab ngadto sa Office of the Bar Confidant.
Kining tanan, sa ato nang gikaingon, dili madali-dali, taas-taas pa kaayo kini nga proseso. Ang iyang reklamo ihatud pa kini sa Integrated Bar of the Philippines (IBP)-Davao Chapter para sa ilang komentaryo. Pagkatapus mobalik pa kini sa IBP national kay sila ang adunay katungod nga magrekomenda og suspension o reprimand. Apan ang ultimatum nga desisyon kon "disbarment" ba o dili mao ang Korte Suprema.
Busa hilom lang ta mga sano, mga brother in propesyon. Dili nato unhan ang mga imbestigasyon kay ang atong katungdanan dili paghimo'g senaryo kon dili pagbalita sa nahitabo na, dili ang paghimo og balita nga wa pa mahitabo, di ba?