NASURPRESA ang mga organizer ug mga nanambong sa gipahigayong Meetings, Incentives, Conventions, Exhibitions/Events (MICE) Conference dihang gianunsyo nga niluwat sa iyang katungdanan si Kalihim Alberto Lim sa Department of Tourism (DOT) sa miaging adlaw.
Si Lim man gud ang nihatag sa opening message MICECON 2011 ug pagkahuman dunay gipahigayon nga press conference.
Sa tibuok adlaw nga dia siya dinhi sa Sugbo, iyang gipadayag ang iyang mga hunahuna kabahin sa turismo nga klaro sa tanan nga naa ang iyang kasingkasing sa paghimo sa Sugbo ug Pilipinas nga usa sa nag-unang destinasyon sa Asya.
Wa siya magpakita nga nagplano na diay siyang moluwat. Gani, maayo kaayo niyang pagkatubag ang panawagan nga siya paluwaton.
OPEN AIR
Atong nasabtan nga kining panawagan nga siya moluwat nitumaw tungod sa iyang pagpadayag og baruganan pabor sa open air policy nga kabahin sa pagpasulod og mga airlines sa airspace sa Pilipinas.
Wa man makauyon niini ang atong mga higala diha sa Philippine Airlines (PAL). Usa sa posibleng epekto man gud sa open air policy mao ang pagkapapas na gyud sa atong national carrier nga mao ang PAL.
Ato sab nga nasayran nga dunay grupo nga gikan sa Manila ug nanganhi gyud sa Sugbo aron motabang sa pagpahigayon og usa ka press conference diha sa Marco Polo Hotel batok kang Lim.
Nasayran nato kini kay duna man sab kitay mga duwende nga nakamalay sa maong operasyon ug gani, nangita pa kining maong grupo og mga babaye aron ilang makuyogkuyog sa pagka gabii.
Ato kining gihisgutan kay naghatag kini kanako og pagtuo nga duna gyuy nasyonal nga kampanya aron mawala si Lim sa DOT ug tuyo niini mao ang pagpakaulaw kang Lim sa pagsugod sa MICECON 2011.
NAGKAHIUSA
Hinuon, samtang makaingon kita nga nilampos ang maong nasyonal nga operasyon nga mawala si Lim sa DOT, palpak ang pagpaulaw kaniya diha sa MICECON 2011 kay sa atong pag-aninaw sa mga reaksyon sa mga stakeholder, nipabor man sila nga magpadayon si Lim.
Ambot lang sab gyud nganong naghilom-hilom ang Lim sa grabing lobby na diay sa Manila nga siya paluwaton.
Ang gikabalak-an karon sa kasagarang tourism stakeholders mao ang pag-usab na sab sa direksyon ug palisiya sa bag-ong nasudnong liderato sa DOT.
Ang mahinungdanon man gud sa turismo mao ang padayong kampanya nga klaro ang direksyon bisan pa man og nag-ilis-ilis ang nasudnong liderato. Nakahibawo na man kita sa Pilipinas nga matag ilis sa bosing sa ibabaw, mausab gyud ang tanan dayon.
MALAUMON
Hinuon, personal ako nga malaumon nga kon si kinsa man gani ang moilis kang Lim, ipadayon niya ang mga nasugdan na nga mga inisyatiba nga malampuson sama niining MICE.
Sa pagkakaron, atong nadunggan ang ngalan sa usa ka Mariano Jimenez isip posibleng ilis kang Lim.
Sa atong mga pamantalaan kagahapon, gihisgutan sab ang ngalan ni kanhi tourism secretary Ace Durano nga maayo kaayo ang performance sa iyang panahon labi na sa pagpasaka sa tourism arrivals dinhi sa atong nasud.
Ubos sa liderato ni Secretary Durano, ang DOT sab ang departamento nga wa mabahigi sa mga pasangil nga pangurakot.
Nasiguro ko nga maayo kaayo si Ace nga itudlo ni Presidente Noy Aquino. Laing ngalan nga giduso alang sa pagka kalihim sa turismo mao sab si kanhi Kongresista Raul del Mar.
Bitaw, nganong di man itudlo ni PNoy ang laing Sugboanon alang sa pagka secretary og tourism.