BISAN paman sa iyang kahimtang wala’y nakapugong sa 19-anyos nga si Jomar Maalam sa paglangkob sa Cobra Ironman 70.3 Philippines kagahapon sa syudad sa Lapu-Lapu.
Ang Palarong Pambansa gold medalist kinsa natawo nga wala’y mga tiil maoy nirepresentar sa iyang grupo sa relay division isip swimming competition.
Gikan sa Zamboanga del Sur si Maalam diin nakat-on siya sa pagsawom tungod kay haduol ra man sab sa dagat ang ilang balay.
Si Maalam kinsa ubos sa grupo nga “Run Todo” nagdamgo nga mamahimong computer engineer.
Ang iyang coach nga si Vince Garcia kinsa nahinabi sa Sun.Star Superbalita nibutyag nga nadani siya sa maong para-athlete dihang nakakuha si Maalam og duha ka gold medal niadtong tuig 2013 sa Palarong Pambansa.
Si Maalam kasamtangan nga usa ka 3rd year high school student sa Tabina National Highschool sa maong lugar.
Nahuman niini ang 1.9K nga sawom sulod sa 45 minutos diin gipakpakan pa kini sa kadaghanan nga misaksi dihang mitimbakawas kini gikan sa dagat.
Si Garcia mao ang coach sa Paratriathlon Association, usa ka organisasyon nga naghatag sa mga para-athletes sa kahigayonan nga makasangka sa nagkadaiyang lumba.
Kasamtangan nga anaa’y tulo ka mga official elite ang maong grupo ug siyam niini ang anaa sa development team kun kadtong nagtuon pa pag-ayo.
Usa si Maalam nga lakip sa development team diin gusto ni Garcia nga dili lang palanguyon si Maalam apan padaganon pa kini ug pabisikletahon.
“We’re planning to train Jomar to bike and run using a special bike and a special wheelchair to do the triathlon on his own,” matod ni Garcia.
Apan nipasabot si Garcia nga gikinahanglan pa gyud og igo nga pagbansaybansay si Maalam para mahimo kini nga elite bisan paman sa iyang kahimtang.
“But if we give him a year or two, I think he has all the potential because he is hardworking,” diin gitandi pa ni Garcia si Maalam kinsa mas kugihan kompara sa normal ug kompleto nga mga atleta.
Pipila ka semana sukad karon ipadala na sa kaulohan si Maalam aron mag-training kini sa umaabot nga Asia Para-triathlon Championship nga ipahigayon karong umaabot Agosto 16 sa Subic.
Pagalangkoban ang maong lumba sa mga para-athletes gikan sa nasod sa Korea, Japan, Malaysia, Hongkong ug Thailand diin 50 ngadto sa 60 ka indibidwal ang gikatakda nga mosalmot.