AC Martin
Tagming
WA MAN mobukal akong lana aning Shamsey Supsup. Di pareha atong Venus Raj ba nga naa gyuy kanang gitawag nga X-factor.
Hinuon, kon mosud si Shamsey sa Top 5 sa Miss Universe pageant karong buntag didto sa Sao Paolo, aw kana kombati. Di ikalimod nga mas brayt hinuon ni siya kumparar atong Venus Raj ug mas daghang bawon nga English.
Pero ang dakong pangutana kon makasud ba? Atong ipangaliya nga unta milagrohan si Supsup. Pero sama na sa akong gikaingon, wa mobukal akong lana.
VALENTINE CONCERT
Kumpirmado na ang Valentine concert ni Sharon Cuneta ug Martin Nievera karong February 11, 2012 nga ipahigayon sa Araneta Coliseum.
Ang wa pa lang matino kon duna bay local producer nga andam mosugal aron dad-on ang maong concert sa Waterfront Hotel-Cebu karong Valentine.
Una ning higayon nga mag-uban ang Concert King ug Mega Star sa usa ka concert ug siguradong patok kaayo ni sa mga Cebuano.
GAMAY RAG KITA?
Bisag taas og rating ang Showbiz News Ngayon, tsugi gihapon. Mas taas man gud kuno og kita sa advertising ang news programs kon itandi sa showbiz talk shows.
Mao kuno ning gi-incorporate nila ang show biz stuff ug ang serious headlines aron usa ray gasto.
Padung na sad mahuman ang Pinoy Biggest Losers nga di sad kuno kaayo ingon ana kadako og kita sa advertising kumparar niadto sa Pinoy Big Brother, nga gikatakdang buksan na sad karong Oktubre.
SAYANG… FLOP?
Wa ko kakita sa “Thelma” ni Maja Salvador apan sigon sa mga nakakita nga nindot og estorya ug maayong pagkahimo ang maong indie film.
Subo lang palandungon kay base sa report nga atong nadawat dili kaayo maayo ang resulta niini sa takilya.
Wa katabang ang mga kontrobersiya ni Maja aron lang ma-estoryahan ang iyang pelikula.
Obviously, wa sad katabang ang iyang paghilak-hilak sa pagka-link niya kang Direk Paul Soriano.
Ang pinaka-nega kuno sa movie ni Maja mao ang nahitabong sukmagay ni Coco Martin ug Matteo Guidicelli tungod niya.