NAALARMA ang siyudad sa pagsaka sa kaso sa human immunodeficiency virus (HIV) human mokabat ngadto sa 23 ka tawo ang positibong natakbuyan niini diin usa na ang nakalas nga kinabuhi.
Si Konsehal Dante Pajo, chairman komite sa maayong panglawas ug vice chairman sa bag-o lang gitukod nga Cagayan de Oro AIDS Council nipasabot sa usa ka interbyu sa radio nga 23 sa mga nagpositibo pulos mga lalaki ug usa niini babaye nga anaa na karon gawas sa nasod.
Nasayran nga pipila sa mga natakbuyan mga tinun-an sa high school ug nalambigit sa MSM kon men having sex with men.
Ang maong mga biktima kasamtangan nga ubos sa medikasyon aron mapalambo ang ilang maayong panglawas matag-adlaw, adunay regular nga check-up nga gipahigayon kanila.
Aduna pay laing tulo nga kasamtangan nga gi-monitor ug gisusi kung nagpamatoud nga nagpositibo human nakasinati og mga sintomas niini.
Tungod niini, pipila usab sa mga ahensya ingon man mga non-government organizations (NGOs) ang ningtabang aron mapalapdan ang impormasyon nga malikayan ang maong sakit ingon man programa batok sa HIV-Aids.
Dugang ni Pajo nga naalarma sila sa gidaghanon kon itandi niadtong nilabayng katuigan labina nga wala man silay pagkulang sa pagpahimangno sa katawhan.
Gipasabot usab ni Pajo nga kung matakbuyan niining sakit makasinati og kalit nga pagniwang, mangluspad, ug pipila kanila dili na maabtan og pila ka tuig makabsan sa ilang kinabuhi labina kung wala gyod dayon gitaho sa doctor.
Gipanawagan usab niini nga kadtong adunay mga pagduda sa ilang kaugalingon kalabot niining sakit bukas ang City Health Office ingon man AIDS Council ug duol lang ngadto kang Dr. Jerie Calingasan aron masuta kung nagpositibo human aduna usab ipahigayon ang regular screening.
Gipasalig sa maong grupo nga magpabiling sekreto kung unsa man ang resulta niini.
Tambag lamang ni Pajo sa mga kababayen-an ug kalalakin-an nga kung mahimo dili na mohimo nianang mga extra marital sex ingon man pakighilawas sa bisan kinsa aron malikayan ang susamang sakit nga hangtod karon wala pay matumbok nga tambal.