TUNGOD sa nagkadaiyang pamaagi nga mabaligya ang siyudad sa ubang nasud, maka-agni og mas daghang bisita, langyaw man o lokal, gipasigarbo sa City Tourism Office (CTO) ang pag-usbaw sa hotel occupancy sa dakbayan sukad Enero ngadto Hunyo ning tuig.
Gitaho ni Jason Magnaye, officer-in-charge sa CTO, nga sa unang unom ka bulan ning tuig naangkon ang 10.4 porsiyento nga usbaw sa hotel occupancy.
Sumala pa nga mas taas kini itandi sa nakalabay nga tuig nga mitala lamang og 335,000, diin karon nga semester miabot kini sa 370,000.
Dugang ni Magnaye nga natapos ang 2010, diin nakatala sila og 670,000 nga bisita.
Malaumon sab ang opisyal nga makab-ot nila ang target nilang 700,000 nga bisitang moanhi sa dakbayan.
Dugang pahayag ni Magnaye nga paspas ang pagsaka sa hotel occupancy dinhi sa dakbayan tungod sab sa 40 ka conventions nga gihimo dinhi, mga tigum, nagkadaiyang estratehiya nga mi-promotar sa dakbayan.
"Sa summerfest nag-increase talaga ‘yung number ng visitors natin. We are looking forward na mag-increase pa till the end of the year," ni Magnaye.
Sa among ihap sa hotel occupancy sa dakbayan, wala pa mahilakip dinhi ang mga bisitang midugok atol sa Kadayawan Festival.
Gilauman sab nga atol sa kasaulugan sa Pasko, diin usa sa highlight dinhi ang Pasko Fiesta sa Dabaw, mas daghang bisita pa ang modugok dinhi. (Rhona O. Goc-ong)