NAGKALISANG-LISANG pagmaayo ang katawhan sa Sugbo tungod sa hulga sa tropical storm “Ramon.” Maayo nalang gani kay human mitugpa sa kabukiran sa Southern Leyte, naluya
ang maong bagyo og mibalik sa pagka depression ug misaka paibabaw, paingon sa Masbate.
Ang gikabalak-an man gud sa atong katawhan mao ang problema sa lunop sa tibuok Metro Cebu nga masinati man gani bisan og cloud burst lamang ang disturbance sa lakaw sa panahon. Samot na og bagyo na gyud ang mopabuhagay ug dako nga bul-og sa tubig uwan sa daan na natong problemadong kasapaan ug baradong drainage systems.
Tungod ning maong kahingawa, ang tanang mga Local Disaster Risk Reduction Councils sa halos tanang mga Local Government Units ang mihimo na sa ilang pagpangandam sa posibling maapektuhan unya sa mga pagbaha.Mao nga nakaandam na ang tanang mga evacuation centers sa nagkadaiyang barangays, mga pagkaon ug medisina alang unya sa mga apektadong mga pamilya.
Samtang dalaygon kining maong matang sa pagpangandam apan maayo tingaleng atong subayon sa pagbalik ang tinud-anay nga tinubdan ning maong problema ug kakulian nga karon naghasol ug naghulga sa kabtangan ug kinabuhi sa atong katawhan.
Kaniadto bugtong ang downtown area ra man sa siyudad sa Sugbo ang makasinati og pagbaha-baha. Pero karon, halos tanang mga dapit nga adunay mga sapa o suba ang na-antos gyud sa grabeng paglunop nga dili na katiaw-tiawan kay ang tubig moabot naman sa hawak ug usahay molapas na sa ulo sa tawo.
Dili hinuon kini angayang ikahibulong kay ang atong kabukiran ato mang gitamnan og mahalong mga subdivisions imbis nga atong butangan sa kakahuyan.
Tiwasan pa sa atong minaot nga kinaiya sa iya-iya ug ako-ako, diin ang mga bentahusong Real Estate Developers ang naneguro ra sab sa drainage sa ilang tugkaran bahala na’g manglutaw ang naa sa gawas nilang mga silingan.
Dinhi sab sa urban areas, nahurot-hurot ang tanang mga dapit ug kalsada sa pagsemento mao nga wa nay lugar nga makatuhop ang tubig sa uwan. Pun-an pa sa atong drainage nga naputos sa lapok og plastic. Karon miresulta gyud ang baha ug lunop kay ang tubig mangita man gyud sa iyang kaagian ug kini ang dili gyud mamahimong kapugngan.
Ensakto na seguro kining atong mga band-aid solutions og maoy angayang tutukan ang long term solution nga maoy tinud-nay nga magsulbad sa problema sa lunop. Unya kini ang angayang pabagahuton karon na nga wala pa kita masugamak og dako nga trahedya tungod sa baha nga kita ra usab sa atong pagpasagad ang nagmugna.