PAGBUTANG og budget, ipatuman ang balaud, inay nga repasuhon.
Mao kini ang panawagan sa Act for Children Alliance kalabot sa panawagan sa uban nga amyendahan ang Juvenile Justice and Welfare Act og 2006 o Republic Act (RA) 9344.
Nahimong kontrobersiyal ang maong balaud, kay tungod niini daghang kabataan ang di na mahadlok sa paghimo'g krimen, tungod alang nila protektado sila sa maong kamanduan.
Apan alang ni Jeanette Ampog sa Talikala, dili pag-amyenda ang problema, apan ang pagbutang sa kasing-kasing sa pagpatuman sa balaud.
"Wala may dautan sa balaud, gimugna man siya aron protektahan ang kabataan, ang panawagan namo is ang intention gyud sa LGUs (local government units) nga kini ipatuman," ni Ampog sa Club 888 Forum.
Dugang ni Ampog nga kon ang bata makasala, di angay nga silutan, prisuhon siya, inay tabangan nga mareporma ang kinabuhi.
Pasabot ni Ampog nga ang unod sa balaud nagyagyag nga matag bata nga malambigit sa krimen manginahanglan og diversion programs nga magsugod diha sa barangay level pa lamang.
Giangkon sab ni Bernardo Mondragon, executive director sa Child Alert nga kuwang ang suportang ginahatag sa matag barangay level sa ilang Barangay Council for the Protection of Children.
Panawagan sab sa grupo ngadto sa LGU ang pagbutang og badget alang sa juvenile intervention programs nila.
Alang sa ACT for Children Alliance di sakto nga basulon ang pagdaghan sa krimen, diin kabataan ang nalambigit ngadto sa pagpasar sa maong balaud. (Rhona O. Goc-ong)