Hulmigas! Nobiyembre 4 na! Sa ato pa, pipila na lang ka adlaw, Pasko na pud. Adlaw ug panahon man gyud ni sa kalipay kay atong handumon ang pagkatawo sa Manunubos, mao nga maglipay gyud ta bisan pa sa unsa dihang mga di maayong hinungdan nga naglibot ug nagpaduol.
Mao man gyud kuno nay marka sa usa ka sumusunod ni Kristo, ang pagka malipayon. Mao na dihâ!
***
Mobisita diay sa Cebu ang relic o mga nahibilin sa lawas (bukog kuno sa tuong bukton) ni St. Jean Baptist De La Salle (dili diay St. John?) karong Nob. 8-18 ug adto sa De La Salle Andres Soriano Memorial College sa Toledo City ibutang ang maong relic sulod sa 10 ka adlaw.
Gikan sa Mactan Cebu International Airport (alas 9 s.b.), moagi sa Marcelo Fernan Bridge, Mandaue City, South Road Properties, Minglanilla, Naga City ug ngadto sa Toledo.
Atong atangan ang pag-agi.
***
Karon diayng gabii ipahigayon didto sa Mactan Export Processing Zone (Mepz) 2 ang San Miguel National Beer Drinking Contest diin ang mga kampeyon gikan sa Luzon, Visayas ug Mindanao mag-abot ug magtigi kinsay mas dali makahurot sa gitagana nga beer.
Mga ngilngig nga banda sa Sugbo ug Luzon (lakip na ang Rocksteddy, Brownman Revival ug
usa ka surprise party band) motukar alang sa kalingawan sa tanan nga gusto malingaw.
Magsugod sa alas 6 s.g. ang kalingawan pero ang bangga mga alas 9:30 s.g. na sugdan.
Kitakits?
***
Wa man ko makakita sa opening sa Pinoy Big Brother Unlimited adtong Sabado kay didto na man ko sa kabukiran sa Tumalog sa lungsod sa Oslob kay mihanggap og lab-as nga hangin ug naminaw sa mga awit sa kalanggaman (o-ha!), gawas sa pagpakighimamat sa kaparyentehan (kay namista, haha!), ako gyung giseguro nga makakita ko niini niadtong Lunes.
Nakadapit dayon sa akong pagtagad ang kalahi sa gitawag og labing inilang balay sa tibuok nasud, ang Bahay ni Kuya, kay hitsura sa slum area ang dating. Lahi kaayo sa nangagi.
Morag nindot ni dâ, nakaingon ko. Sa mga housemates, si Kigoy sa Ormoc ug Divine sa Cebu ang akong napansin tungod sa ilang pagkanatural manglihok.
Kana bang way gikahadlokan nga may madiskobrehang tinaguan ang nanan-aw. Kon makalahutay ba sila, sayo pa kaayo itag-an. Manan-aw lang una ta aron malingaw (ug manaway ba kaha?). Anà.
***
Lain nakong giatangan ang pagbalik sa loveteam ni Richard Gomez ug Dawn Zulueta sa teleseryeng Walang Hanggan kauban sa daghang mga sikat nga batan-on ug edaran nang mga artista.
Ngano? Kay diha toy higayon nga nagtuo kong parehas mig nawong ni Richard! Haha! Pasagdi lang god ko. Ako man nâ. Pagdamgo pud mog inyo! Di ko manghilabot kon magdamgo mong mas gwapo pa mo ni John Lloyd Cruz, Piolo Pascual, Paolo Avelino ug uban pa. Pramis. Hehe!
***
Nalipay ko nga nagkauli na kuno ang pamilya ni Charice ug ang sa iyang amahan human giingong nagbinayloayg masakit nga pulong sa pagkamatay gyud sa amahan ni Charice. Anà gyud. Ang kamatayon giingong maoy higayon nga mag-uli ang mga nasilong kabubut-on tungod ug alang sa kapahulayan sa namatay.