UNSA MAN? Napraning na pud mo sa 11-11-11 nga maoy petsa karon? Porbida. Ordinaryo ra man kuno karong adlawa matod pas mga scientists ug mga eksperto. Padayon lang ta sa atong mga paningkamot ug hangad ngadto sa Ginoo. Anà ra.
***
Sa wa pa gipasalida ang The Unkabogabol Praybeyt Benjamin, giingong posibleng makoronahan nga box-office queens sila si Cristine Reyes ug Anne Curtis ug isip box-office king si Derek Ramsay tungod sa kadako sa kita sa No Other Woman.
Unya unsa na man kini karon nga nalabwan man kaha sa Praybeyt Benjamin ang No Other
Woman? Sa ato pa, way makoronahan nilang Cristine, Anne ug Derek? Kay pwede mang adto na lang tanan kang Vice Ganda isip box-office king ug queen. Box-office Queeing? Paet.
Posible kaha na? O basig papili-on si Vice kon gusto ba siyang queen o king ba hinoon.
Kalibog ba!
***
Gikuyawan na kuno si Sarah Geronimo kay ang pelikula nila ni Gerald Anderson nga Won’t Last A Day Without You isalida na man karong Nob. 23. Kay nagsunod man kini sa duha ka blockbusters, mao nga gikuyawan si Sarah sa mamahimong kapalaran niini sa takilya.
Aw, duna na baya silay mga magdadayeg si Gerald. Mao bitaw tong sa wa pa ang duha ka pelikula sa unahan, ang ilang Catch Me I’m Falling In Love man gyud kuno ang labing dakog kita nga pelikula sa Star Cinema karong tuiga.
Atong atangan ang plano sa mga Sarah-Gerald fans aron makagukod ang ilang mga idolo.
***
Nindot ang gipakitang labok sa mga Pinay sa natad sa pagwapahay karong tuiga. Nahimong 3rd runner-up sa Ms. Universe si Shamcey Supsup di pa lang dugay. Milugwa isip People’s Choice Award winner ang Bb. Pilipinas-International nga si Dianne Necio gawas nga milandig usab kini sa top 15.
Bag-o lang, hapit gyud malangkat ni Ms. World-Phils. 2011 Gwendolyn Ruais ang korona isip Ms. World. Gamay ra kunog ligas ug ni Ms. Venezuela.
Kon atong tan-awon, nasugdan kini ni Venus Raj sa miaging tuig tungod sa iyang major-major win isip 4th runner-up sa Ms. U. Nakabalik na pud sa mapa sa kaanyag ang Pilipinas.
***
Pwerteng lingawa sa mga nanambong sa San Miguel Beer National Beer Drinking Finals didto sa Mactan Export Zone 2 niadtong miaging Biyernes. Gawas nga nagbaha gyud ang beer (dunay flavored beer nga adto lang gabhiona nako natilawan ug nauyonan ang lami), alegre pud ang mga maglilingaw, ang bandang Rocksteddy ug Brownman Revival.
Morag gibidli ang mga babaye ug medyo babaye sa bokalista sa Rocksteddy nga pirmeng makita sa Showtime. Di gud kaayo ambongan pero medyo bastos matud nila ni Ehda Dagooc, Divine Sanchez, Aileen Yap, Debbie Duraliza ug Vanessa Balbuena.
Mga pahalipay diay sa Team Sweet Mama Boom sa Brgy. Tanza, Magalona, Neg. Occ. midaug sa tunga sa milyon ka pesos nga premyo. Ingon man ngadto sa Choke Boys of GMA North ug sa Samahang Magbabarkada sa Southern Luzon midaug og P200 mil ug P100 mil! Maayo mo dihâ uy!
***
Upat na ka Sugbuanon ang naa sa Bahay ni Kuya sa PBB: Divine Maitland-Smith, Slater Young, Johnny Busarang ug Jessica Connelly. Si Jess ray nalahi kay pang-adlaw siya.
Gawas aning upat, nakakuha sa akong pagtagad ang lain pang tulo ka housemates: Kigoy, Biggel ug Carlo. Wa pay nakapa-impress nako sa mga babaye.