SUBLI nga gipahimangnoan ang tanang nagbaligya sa pabuto dinhe sa Northern Mindanao nga sundon gayud ang product standard sa Department of Trade and Industry (DTI) aron malikay ang publiko sa aksidente diin ang hinungdan pabuto.
Kini ang mensahe ni Atty. Fel Lester Brillantes niadtong Martes sa dihang nahinabi sa Sun.Star Cagayan de Oro, kinsa hugot gayud nga nanawagan nga unta walay bisan unsang peke nga pabuto ang maghitak hilabina dinhi sa Cagayan de Oro.
Matud pa niya kasohan gayud sa ilang opisina ang kinsa man nga molapas sa balaud sa standardization law sa mga firecrackers.
Hinoon, gi-klaro niini nga walay bisan usa ka firecracker retailer nga nasapon nagbaligya ug non-standard firecrackers niadtong miaging tuig ang nakasohan tungod sa dili niini matino nga hinungdan.
Apan gi-klaro niini nga administratibo lamang ang mahimo nilang kaso batok sa mga suspetsado. Alang sa criminal offense ang PNP lamang ang dunay katungod mosang-at ug kaso batok kanila.
Gipanawagan pa niini nga unta dili mopalit sa non-standard products and publiko aron sila mismo mahimo malikay sa kadaut.
Niadtong imaging tuig, ubay-ubay nga panghitabo sa aksidente ang nalista sa otoridad hilabina sa Department of Health (DOH), ang ahensiya sa gobyerno nga maoy unang makahibalo sa aksidente tungod sa pabuto.
Ang DOH, usa sa miyembro sa Anti-Firecrackers Task Force sa rehiyon, nanawagan usab ngadto sa publiko nga unta mo-kooperar sila nga maundang kon dili man maubos ang numero sa aksidente tungod sa pabuto.
Kon ugaling dili gayud mapugngan sa pagpabuto pag-abot sa pasko ug bag-ong tuig, kinahanglan mabinantayon ang publiko nga dili sila maperwisyo o dili ba kaha maka-perwisyo. (Loui S. Maliza)