Estrella Dolores
Sambag 2, Cebu City
NAHILIS sa kaibog si Lucy nga nagtan-aw sa sinawng parol nga kometa nga bulok puti kansang daplin dalag nga giring-giring ang pagkahimo. Ang taliwa pinong tinibuok nga laso nga berde nga gipapilit. Samtang ang gamayng arko sa pino sad nga wax paper nga gipatuyok sa kometa migilaw sa bulok asol. May kalit nga misulod sa iyang hunahuna nga nagtukmod kaniya sa paglipot ngadto sa luyo ning puting balay nga layog gamay sa highway.
Mikapyot siya sa sanga sa kamansi nga naabot niya sa paglukso kay migawas ni sa koral.
Suhito siya sa balay kay kanunay siyang makaagi sa iyang pagpamasura. Taudtaod didto na siya sa may atubangan sa balay diin nagbitay ang parol. Milingi-lingi siya. Wa siyay nakitang tawo nga miagi sa dalan sa kilid sa balay. Dihang iya na untang kuhaon ang parol kalit may miabli sa pultahan; maayo nga abtik siyang nakahupo. Nakita niya ang katabang nga nagdalag basura sulod sa plastik nga itom.
Miabli kini sa koral ug mipadulong sa basurahan sa may daplin. Humag yabo sa basura mibalik sa balay apan nakalimtan ang pagsirado sa gate. Dihang nakasulod na ang katabang, milingi-lingi siyag balik pagtino kon wa bay tawo nga nakalantaw sa iyang nahimutangan. Mitikang siya sa hagdang semento, dayon gilagnot ang parol nga kometa,
ug misutoy sa inablihang gate.
Nag-awas-awas sa kalipay ang dughan sa iyang anak nga si Lito nga nidawat sa parol nga iyang dala. “Kaanindot niini, Tay, seguro gyung makadaog ko sa among lantern contest.
Diin man ka ani, Tay? “Daling gibakakan ni Lucy ang iyang anak. “Hinatag sa akong higalang dato, Lito.”
Miabot ang adlaw sa lantern contest nila ni Lito. Daghan ang nakadayeg sa iyang parol nga kometa nga nagbitay taliwa sa kutay sa mga parol nga nagkadaiya lang ang bulok.
Siya gyud ang makadaog sa unang ganti, kini ang pangagpas ni Lito. Kadagko ra ba sa mga ganti. Pagkahuman sa literary-musical program, gipahibawo dayon ang mga mananaog.
Hapit mahunlos si Lito sa iyang gibarugan dihang milanog ang iyang ngalan nga maoy nakakuha sa P15,000.00 isip unang ganti sa bangga.
Naglibog siya nganong gipatawag sa principal’s office. Naghikab-hikab ra ba unta siya nga makapauli dayon aron ihatag niya ang ganting salapi ngadto sa iyang amahan.
Nakita niya sa opisina sa principal ang ilang supervisor nga maoy tsirman sa mga maghuhukom sa contest nga nagpahiyom kaniya. Si Mr. Mendez, ang principal, igo lang mitan-aw niya sa tinan-awan nga may gipasabot nga di niya matuhog.
“Lito, ayaw na usba ang imong gibuhat kay dautan kadto. Ako nang parol nga nidaog sa bangga nga gikuha sa akong pultahan.”
“Kuan, Sir wa ko ma….”
“Ayaw na lang, Lito, pagpamakak.” Mipakgang ang principal. “Ayaw na lang gyud usba.”
Mipahiyom pag-usab ang supervisor. “Imo na to Lito.”
Naghilak si Lito nga migawas sa opisina. Sudyaan niya si Papa niya Lucy inig-abot niya sa ila. (Katapusan)