DAKONG tabang ang programang Pantawid Pamilya Pilipino Program (4Ps) sukwahi sa pagsaway sa uban nga wala kini nabuhat nga kaayuhan dinhi sa Davao Region.
Niadtong miaging semana migawas ang resulta sa surbey nga gihimo sa Social Weather Stations (SWS) nga nagpahibalo nga misaka ang hunger incidence sa nasud og 22.5% sa pagtapos sa 2011.
Sa interview kang Gabriela party-list Representative Luzviminda Ilagan sa usa ka mantalaan sa nasyonal gisulti niini nga pakyas ang conditional cash transfer (CCT) program sa gobyernong Aquino.
"The CCT program has helped the poor families here in Region XI (Davao Region)," ni Sheryll Sanico, Information Officer sa 4Ps sa rehiyon.
Gibutyag ni Sanico nga daghan ang natabangan nga kabus sa lalawigan sa Davao del Sur subay sa pahayag ni Governor Dauglas Cagas.
Siya midugang nga bisan si Davao Oriental Governor Corazon Malayaon nagsulti nga ang programa mitubag sa tumong sa probinsiya nga makunhuran ang kapobrehon.
Sa pikas bahin, may dugang 13 ka bag-ong munisipalidad ug tulo ka siyudad nga nadugang sa 4Ps.
Ni Sanico may dugang target beneficiary sila nga 53,175 households dinhi sa Davao Region, diin ang Padada, sa Davao del Sur na lamang ang wa maapil. (Rhona O. Goc-ong)