SUBAY sa kagustohan ni Cebu City Mayor Michael Rama, ang hepe sa Carbon Police Station girelibuhan na sa katungdanan sugod kagahapong adlawa.
Si P/SSupt. Melvin Ramon Buenafe, director sa Cebu City Police Office, nitug-an sa Sun.Star Superbalita nga iya nang gibalhin si Chief Inspector Renero Agustin, kanhi hepe sa Station 5, ngadto sa Public Safety Community (PSC) sa CCPO nga maoy nagmintinar sa peace and order sa 21 ka bukirang mga barangay sa dakbyan.
Ang hepe sa PSC nga si Chief Inspector Pablo Cabildo maoy nihulip kang Agustin isip officer-in-charge sa pwesto nga iyang gibiyaan.
Si Cabildo maoy kanhi hepe sud sa duha ka mga tuig sa Station 5 sa wa pa siya gibalhin sa PSC samtang si Agustin maoy niasumir sa iyang buhatan.
Karon nagbaylo na usab sila og posisyon paglabay sa dul-an sa duha ka mga tuig.
Si Buenafe niasoy sa Sun.Star Superbalita nga iyang gikuha pagbalik ang serbisyo ni Cabildo sanglit suhito siya sa mga area of responsibility (AOR) sa station 5.
`Ang paghulip kang Agustin nagagumikan sa daghang patay sa iyang AOR nga hangtod karon wa pa mahatagi og kasulbaran.
Labing uwahing krimen mao ang pagpusil patay sa sakop sa barangay intelligence network (BIN) nga si Catalino Entoma sa Unit-II Carbon Public Market.
Bisan pa man sa hitabo, si Buenafe nidayeg gihapon sa paningkamot nga gihimo sa iyang mga tawo sanglit way mga high profile case nga nahitabo sa Sugbo sama sa kidnap for ransom, assassination, media killing ug uban pa.
Si Buenafe nipatawag sa iyang 11 ka mga station commander aron sa paghimo og tukmang lakang alang sa daling pagresponde ug pagsikop sa mga mamamuno panahon sa hitabo.