GISUGAT sa host Indiana Pacers ang pagbalik sa usa sa ilang labing pambato nga si Paul George pinaagi sa dakong kadaugan batok sa Miami Heat, 112-89, kagahapon sa National Basketball Association (NBA).
Tanan nakatutok kang George hilabi na dihang nabakante siya sa kilid nga bahin sa korte sa hinapos nga bahin sa 1st quarter ug nagdahom ang nagpunsisok nga mga sumodsunod sa Pacers sulod sa Bankers Life Fieldhouse og usa ka panghitabo nga lisod hikalimtan.
Imbes makapaukyab nga hansak, nga makakompirmar nga nahibalik na sa hingpit ang kondisyon ni George, ang two-time All-Star igo na lang mi-layup ug mipahiyom dayon pagkahuman.
“That’s why I’m happy I chose to come back now and get some games under my feet, so I can eliminate those mistakes going forward,” matod ni George. “It was an embarrassing moment, but I’m happy to be embarrassed at this time.”
Mao kini ang labing unang pagduwa og balik ni George human nabali ang iyang tuong bitiis niadtong Agusto sa miaging tuig atol sa preparasyon sa Team USA alang sa FIBA World Championship.
Kon buot hunahunaon, layo pa si George sa iyang siyento porsiyentong kapabilidad apan ang iyang presensya sulod sa korte igo na aron mas magmadasigon ang iyang mga kauban.
Tataw nga nagmatngon si Indiana coach Frank Vogel sa iyang paggamit kang George, kinsa niamot og 13 puntos alang sa kadaugan.
“I thought he looked good,” asoy ni Vodel kabahin kang George. “We’ve seen him play for five weeks [in practice] and what we saw out there wasn’t any different than what we’d been seeing. He shot the ball well. You could see how much we’d missed him on the defensive end, how he impacts so many different plays with deflections and his instincts. I thought it was a solid first effort from him.”
Ang pagbalik ni Goerge tayming lang gyud kay nagkinahanglan ang Pacers nga makadugang pa’g kadaugan alang sa katapusan nilang hunat aron makakumpayot sa playoffs.
Ang Pacers nakigbahin sa Heat sa ikasiyam nga puwesto sa Western Conference dala ang 34-43 nga rekord.
Ang mopatigbabaw nga walo sa Eastern ug Western Conferences mao lang ang makaabante sa playoffs.
Gatusan sa mga ningtan-aw nagsul-ob og jersey ni George unya linibo ang miwarawara og senyal nga adunay nakasuwat nga “Welcome Back PG.”
Ninglanog ang abiba dihang gihubo ni George ang iyang puti nga warm-up T-shirt ug nisulod sa korte sa nahabiling 5:34 minutos sa 1st quarter.
Pipila ka mga segundos ang ninglabay, ninglanog na sab ang abiba dihang nakagunit og bola si George sa labing unang higayon.
Mas nilanog ang abiba dihang nawani ni George ang depensa ni Heat guard Mario Chalmers ug napasulod niya ang iyang jumpshot, nga maoy labing una niyang puntos gikan sa iyang pagkaangol.
“These fans welcoming me back into the game was probably the most gracious moment that I’ve had,” matod ni George. “It’s so hard not to get caught up in the moment. I didn’t want to get too riled up, but man, just happy to be back to the game.”
Padayong naglanoglanog ang abiba hangtod hingpit nga naangkon sa Pacers ang kadaugan. (AP)