BACOLOD

Sugilanon: Sa imong mga kamot

Javier Yntig Tapulado
Banawa, Cebu City

INIT kaayo ang adlaw sa kuwaresma. Mialisngaw sa kaigang ang lapad nga dalan nga gibahis-bahisan sa nagdaling mga sakyanan. Sa daplin naglakaw si Noy Adelo nga nagpandong og brown folder.

Huwebes Santo karon. Moadto siya sa dakong balay sa magtiayong Lourdes-Bentong aron pagtuman sa iyang gisaad niadtong naghinangat pa ang Semana Santa. Sikat nga mamumulong sa Siete Palabras si Noy Adelo. Panahon sa Biyernes Santo pinaminaw sa katawhan ang ilang tinuig nga programa sa radyo nga gipasiugdahan sa ilang grupo nga mga magsusulat sa Dilang Bisaya.

Paghitungod ni Noy Adelo niadtong gamayng billboard sa atbang nga bahin sa dalan nabasa niya ang nahasulat: TO GREEN PLAINS SUBDIVISION. Milabang siya. Apan pipila pa lamang ka lakang ang iyang nahimo kalit nga miinit ug misakit iyang ulo, nagpuot iyang dughan, namuypoy iyang mga bukton ug naglisod siya pagginhawa. Inanay siyang nalipong.

Wala siya makaalinggat sa naghaguros nga V-Hire.

Duol na kaayo ang V-Hire dihang nakamatikod si Noy Adelo niini. Buot siyang molikay, apan wala nay panahon. Nalup-og siya. Sanglit nagtuo man siya nga mao na kadtoy iyang katapusan, misangpit siya sa Ginuo, “Amahan ko, sa imong mga kamot itugyan ko ang akong kalag!”

Naniyagit ang mga tawo nga nakakita sa makalilisang nga hitabo. Milupad si Noy Adelo human hidasmagi sa V-Hire. Daghan ang nagtuo nga patay na si Noy Adelo pagtugpa niini sa yuta.

Gitapuk-an si Noy Adelo sa mga tawo nga gustong motabang niya. Apan naniga ang ilang mga mata dihang sa ilang pagduol, dali nga mibarog ang 55 anyos nga hamtong ug namap­ha sa abog nga namilit sa iyang karsones. Nagsipit gihapon siya sa brown folder.

Naglibog sila nganong ingon sa wala lay nahitabo kang Noy Adelo. Gikuha niya ang brown folder gikan sa iyang ilok ug may gitan-aw. May nahisulat “Ikapitong Pulong: Amahan ko sa imong mga kamot itugyan ko ang akong kalag!”

May lalake nga diha sa duol ni Noy Adelo nakabasa sab ug nangutana, “Asa man diay ka paingon, Noy? Sa ila bang Ma’am Lourdes ug Sir Bentong?” Mitando si Noy Adelo.

“Kon mao, kuyog na lang ta kay adto man pod mi paingon,” gikan sa mga tawong nag-alirong kaniya.

Nahaigking si Noy Adelo paghiabot niya didto sa giandam nga altar sulod sa balay nilang Lourdes-Bentong. Sa itaas nakita niya ang hitsura sa imahen ni Hesukristo nga gilansang sa krus. May nahinumdoman siya. Ang maong hitsura mao gyud ang panagway niadtong Tawo nga misapnay kaniya kaganina padulong sa itaas aron dili siya maigo sa naghaguros nga V-Hire. Karon nakasabot na siya nganong way tatsa bisan gamay iyang lawas.

Pag-abot sa iyang turno nga siya na ang mobatbat, gikuha niya ang iyang sinulat.

Mitulo ang iyang mga luha. Unya misugod siya pagbasa, “Ikapitong pulong: Amahan ko, sa imong mga kamot itugyan ko ang akong kalag!” (KATAPUSAN)
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">



style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="4158864647">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph