ADLAW kagahapon sa mga mamumuo nga gisaulog dinhi sa nasud sukad pa niadtong 1903 dihang ubos pa sa pagdumala sa Estados Unidos ang Pilipinas.
Wa damha ning inyong ubos nga higala nga usa ako sa mga palarang mamumuo kagahapong adlawa nga kabahin sa makalingaw nga Employee's Day sa Sun.Star Davao Publishing Inc.
Makalingaw ang maong programa nga gilamasan sa daghan paduwa ug dagkong premyo.
Gibahin kami sa tulo ka team nga gilangkuban sa mga empleyado sa nagkadaiyang departamento. Gipakita dinhi ang panaghiusa ug pagtinabangay sa tanan. Ug lunlon kalipay ang mihulma sa panagway sa tanang empleyado.
Dinhi nako nakita ang pagkamapinanggaon sa among gialagaran nga kompanya.
Subo lamang palandungon nga samtang naglipay-lipay kami sa Isla Reta, Talicud Island sa Island Garden City of Samal, nagprotesta sab ang mga mamumuo dinhi sa dakbayan aron ipasibaw ang ilang mulo sa gobyerno.
Nagmartsa sila aron ipadayag ang nahitabo kanila isip mga mamumuo. Ang uban biktima sa illegal termination, contractualization, ug labaw sa tanan wa makadawat sa minimum nga suhulan.
Buot lamang nakong ipaambit sa ubang kompanya nga ang Sun.Star Davao nagsunod gayud sa Labor Code. Tanang benepisyo gihatag. Gani, sobra pa sa minimum ang gidawat nga suhol sa mga empleyado. Busa, malipayon kaming tanan sa adlaw sa pamuo.
Lakbit saysay, kagahapon mao ang kasumaran sa nahitabo sa usa ka gatus kalibo ka mga trabahante nga gi-organisa sa Union Obrero Democratica de Filipinas (UODF).
Sa maong adlaw nagmartsa sila paingon ngadto sa Malakanyang aron ireklamo ang ilang kahimtang isip mamumuo.
Tungod sa ilang gihimo, gironda sa mga sakop sa Philippine Constabulary ang printing press sa UODF ug giaresto ang ilang Presidente nga si Dominador Gomez.
Ang pasangil batok kanila mao ang illegal assemby ug sedition.
Napulo ka tuig ang milabay, Mayo 1, 1913, natukod ang Congreso Obrero de Filipinas nga gipangulohan ni Herminigildo Cruz.
Siya ang nakigbisog sa walo ka oras nga working day ug pagwagtang sa child labor.
Sukad niadto gisaulog na ang Labor Day matag Mayo 1.
COLA
Kon ang Department of Labor and Employment (Dole) ang pasultihon, duna silay nahimong kaayuhan tungod kay dunay P10 nga cost of living allowance (Cola) alang sa mga mamumuo sa rehiyon onse.
Apan alang sa Kilusang Mayo Uno (KMU), usa kini ka ulog-ulog sa gobyerno ngadto sa mga mamumuo!
Hinuon, kon ang masinabuton nga mamumuo ang pasultihon, maayo na lamang kini kay sa way jamo!
Wa nako damha nga sa adlaw sa mamumuo, dunay laing tahas na usab ako alang kaninyo!