KIDAPAWAN CITY - Tulo ka mga tawo ang nangaangol sa granada nga mibusikad alas 5:10 sa hapon niadtong Lunes.
Giila ang mga biktima nga sila Nilda Tambangan, 56, Teresita Catieles, 39, ug Jorepa Quinones 53.
Si 6th Infantry Division Public Affairs chief Colonel Prudencio Asto nagsulti nga duha ka wala mailhing tawo nga sakay sa usa ka motorsiklo maoy miitsa og granada sa bay ni Julit Mariscal didto sa Rogue Dandan Street, Barangay Poblacion, Pikit.
Sa pagbusikad sa granada, naigo ang mga biktima kinsa paryente lang ni Mariscal nga municipal treasurer sa Pagalungan, Maguindanao.
Abtik sab nga misibat ang mga suspetsado paingon sa wala matino nga dapit samtang ang mga samaron ang gidala sa ilang mga paryente sa Dr. Cruzado Hospital.
Dako ang pagtuo ni Pikit Mayor Sumulong Sultan nga posibling dunay koneksiyon sa trabaho ni Mariscal ang pagpanglabay og granada sa iyang balay.
Sa kasamtangan gimando na ni Cotabato Governor Emmylou "Lala" Talinio Mendoza ngadto sa kapulisan ang hugtanon nga imbestigasyon sa naasoy nga hitabo. (Edgardo Fuerzas)