SECTIONS
Thursday July 19, 2018
BACOLOD

Aswang subling miatake

MAGUINDANAO PROVINCE - Mas misamot ang kahadlok nga gibati sa mga molupyo sa Barangay Makir, Daut Odin Sinsuat human nga subling miatake ang aswang alas 11 sa gabii niadtong Miyerkules.

Gibutyag ni Mike Lumenda nga matag gabii, ilabina kung mag-ulan, makadungog sila nga daw dunay nagkuskus sa atop sa ilang bay, unya kalit sab dayon nga molupad kon mangmata na ang ilang mga silingan.

"Nakakatakot talaga dahil 'yong anak ko nakagat na ng aswang noong nakalipas na gabi. Ngayon parang may lumilipad tuwing gabi na parang manananggal," sigun ni Lumenda.

Usa sab ka alyas Kagui ang nagsulti nga didto sa highway sa maong barangay, usa ka sakyanan ang nakabangga og dakong tawo sa kalsada.

Apan sa diha nga nanaug sa pick-up ang drayber aron tabangan ug dal-on sa balay tambalanan ang biktima, wala siyay nakita gawas lamang sa daw baboy nga ihalas nga misum-ok sa kalibunan kilid sa kalsada.

Apil sab si Kapitan Esmael Abas sa Barangay Makir nagtuo nga aswang ang nanghasi sa ilang dapit gumikan dili lamang usa ka tawo ang nakakita niini apan halos ang tanang molupyo sa ilang dapit.

Kahinumdoman nga niadtong miaging gabii usa ka bay ang gisulod sa aswang ug gipaak sa kamot ang usa ka alyas Jovy ug dunay kinawrasan sab siya sa bukton.

Gilapa sab sa aswang ang binuhing kanding sa silingan ni Lumenda.

Apan si Abas nagsulti nga miubos ang krimen sa ilang dapit, ilabina ang kawat, gumikan sa pagpanghasi sa giingong aswang.

Nag-andam na og kawayan nga bagakay ang mga barangay tanod nga maoy ilang gamiton kon ugaling subling moatake ang aswang. (Edgardo Fuerzas)


VIEW COMMENTS