SA AKONG ikaupat nga pagbalik sa barangay Tan-awan sa akong lungsod nga natawhan sa Oslob kuyog sa akong mga paryente ug higala sa Catmon ug silingang dapit (William ug Techie dela Cerna, Nenen Cabatingan, Rosie Joring, Stephen Alabado ug Almer Sumanduran) niadtong miaging semana, nahimo na lang ikaduhang tuyo ang pagtan-awg usab sa mga tuki.
Duna ra ba diay kunoy bag-o lang “nasaag” didto nga pwerteng dakua pero wa ra sad magdugay.
Ang akong unang tuyo didto mao ang pagsukitsukit sa mga higala sa pagbisita ni Superstar Nora Aunor ug mga kauban didto aron pagsyuting og pipila ka eksena alang sa pelikulang Thy Womb.
Gawas kang Nora, didto sab diay kuno sila si Bembol Roco, Lovi Poe, Iza Calzado ug syempre ang direktor nga si Brillante Mendoza. Matud sa akong nakaistorya, gidala pa gyud kuno si Nora sa Barangay Nueva Caceres nga nagpista adtong adlawa ug gisyutingan na sab samtang nagdulot og pagkaon sa mga bisita.
Seguradong atangan gyud ang maong pelikula niadtong gisilbihan ni Nora. Tiaw mo bang naartista sila nga wa damha? Panagsa ra na mahitabo.
***
Ugma, gitakdang pormal nga ablihan ang bag-ong museo sa lungsod sa Oslob nga naa ra sab mahimutang sa sulod sa Cuartel Heritage Park ug luyo gyud mismo sa karaang edipisyo diin gikuha ang ngalan sa park.
Kini kalabot sa gipahigayon nga heritage week sa lungsod. Si Gob. Gwen Garcia mismo ang mangulo sa seremonyas. Duna say unveiling sa mga markers sa uban pang mga heritage structures ug sites ingon man ang pag-abli sa gipanindot nga palibot sa Tumalog Falls.
Kini mga dugang talan-awon nga ikadalit sa mga turista labi na kon mahuman na silag tan-aw sa mga tuki. Mga pahalipay!
***
Bisan kapin pa sa bulan una ang tinuig nga pista sa Sitio Bachao, Catmon, duna na koy nahibaw-an nga usa ka kalihukan atol sa pista gyud mismo sa Hunyo 30.
Ang banda sa 78th Infantry Battalion giimbitar ni David ug Ely Dickinson nga molingaw sa ilang mga bisita nianang gabhiona. Nag-imbitar usab silag usa ka babayeng mag-aawit nga mokanta dinuyogan sa maong banda.
Dugang kining kalingawan sa pista.
***
Ang pundok sa mga pari nga mokantag mosayaw nga gitawag og The Cebu Clergy Performing Artists magsaulog sa ilang ika-10 ka tuig sa pagkapundok pinaagi sa usa ka konserto nga gitawag og X Men in White unya sa sunod Biyernes, Mayo 18.
Sa Grand Convention Center himoon ang maong konserto. Usa kini ka dinner show diin tipik sa kitaon ihatag sa Youth Ministry Keepsake Ass’n. Inc. alang sa scholarship program niini.
Alas 6:30 s.g. magsugod ang dinner. Ang pasundayag magsugod sa alas 8 s.g. Di sakit sa bulsa ang bayranan kay ubos ra man ang presyo unya may panihapon pa. Makatabang pa gyud.
Ang mga pari duyugan sa banda nga gitawag og Behind The Habit Band. Ang nagbakasyon gikan sa iyang trabaho sa Hong Kong Disneyland nga si Maria Donna maoy special guest.
Nagpabiling init ang ilang gugma sa ilang bokasyon ug sa mga tawo nga ilang giserbihan ang tubag sa mga pari dihang gipasupot ni Charlotte Cinco ang iyang signature question nga ‘how is your lovelife?’. Gwatsinangga sab ni si Inday Charlotte.