SECTIONS
Thursday, November 15, 2018
BACOLOD

Roldan: Flores de Mayo

NAHIMONG tradisyon sa mga Katoliko ang Flores de Mayo. Sa usa ka bulan sa Mayo ang mga bata magtuon sa kinabuhi ug talagsaong papel ni Mama Mary sa misyon ni Jesus dinhi sa kalibutan. Gitun-an usab ang mga bata og katekismo ug mga pagtulun-an sa simbahan.

Halos kaming tanang magsuon nakaagi gyud og Flores de Mayo sa among parokya sa probinsiya dili lang aron makat-on apan aron mawala ang kalaay sa balay tungod sa bakasyon.

Nindot sab kaayo ang merienda sa among panahon nga mga imported nga gatas, trigo ug yellow corn nga gikan sa relief services sa USAID ug uban pang nasud.

Nag-asoaso pa ang gatas sulod sa gihaon nga dagkong kaldero samtang naglinya kaming mga bata dala ang among tagsa-tagsa ka sartin nga cup nga among tusloban sa gahi nga biskwit nga moaso kung huypon.

Dili na gyud usahay mahurot ang sinako nga gatas busa gipanghatag na lang sa silingan aron himuon nga pulburon samtang ang uban gipanglabay kay nabantok.

Duna pay panahon nga "Nutri-bun" ang merienda o pan nga mora'g hitsura sa "Pan Francis" apan mas bug-at ug makabusog kaayo.

Sa pagpanglabay sa panahon, nilahi na ang merienda sa Flores de Mayo. Duna nay sampurado, arroz caldo ug pan nga giparisan og juice, ice candy o softdrinks.

Maayo ang Flores de Mayo kay makat-onan sa mga batang Katoliko ang pagpangadye, pag-rosaryo, pagkanta sa mga huning relihiyuso, mga sakramento, pag-ila sa mga Santos ug sa pakiglambigit sa isig-kabata.

Busa gipaapil namo ang among duha ka anak matag buntag sa among gamay'ng kapilya sa San Isidro Labrador sa Ciudad de Esperanza kay among nabantayan nga nagyampungad lang sila kanunay sa computer ug TV aron motan-aw og cartoons.

Amoa sab nga nabantayan nga magsige lang sila og away kay walay laing mabuhat sa balay. Tuod man, nalipay kami nga ilang naagian ang among eksperyensa kaniadto. Wala koy ikasaway niining tinuig nga tradisyon sa simbahan aron masinati pa nila ang gugma ug grasya sa Diyos sa ilang kinabuhi.

Apan akoa lang hangyo nga motuon pa og dugang ang mga katekista sa Theology kay basin sipyat ang ilang gitudlo.

Nakapaminaw ako sa ikaduhang adlaw sa pagtudlo sa Katekista sa Flores de Mayo ug naghatag siya og assignment sa mga bata kabahin sa papel ni Mama Mary nga iyang gisulat sa blackboard.

Iya sab mga gisulat nga ang Santisima Trinidad gilangkuban sa Diyos nga Amahan, Diyos nga Anak ug Diyos Espiritu Santo. Nabasa ko usab kini nga gikopya sa notebook sa akong anak. Giduol nako ang katekista sa panahon sa break ug gihunghungan nga basin isipon sa mga bata nga may tulo ka Diyos ang Katoliko nga sagad ginabatikos sa laing mga relihiyon kung dili ma-correct. Nitubag siya nga mao daw kini ang anaa sa ilang giya.

Ambot kaha kung mosugot ba niini ang Pangulo sa Pagpanudlo ug si Fr. Pete Lamata nga Kura Paruko sa maong parokya? Si Fr. Malley kaha sa IIREF?
Sa kinatibuk-an, nidayeg ako sa paningkamot sa mga pangulo sa among GKK aron mapahigayon kining kalihukan sa simbahan karong tuiga.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!