HUMAN sa gikatahong “frat war” sa habagatan sa probinsiya, gitubag kini sa norte human usa ka 22 anyos ang gibuk-an sa iyang ulo sa gituohang sakop sa fraternity samtang nagtan-aw sa disko kagahapon sa alas 4:00 sa kaadlawon sa Barangay Estaca, lungsod sa Compostela.
Si Reynaldo Paras, hamtong na, ulitawo nagpuyo sa samang dapit ang gideklarar nga dead-on-arrival (DOA) sa tambalanan human nakaangkog samad pinusilan sa iyang ulo.
Samtang, naangol si Christopher Basay, 12, nagpuyo sa samang dapit human maigo sa saag nga bala sa iyang wala nga tiil.
Si PO2 Arni Goc-ong, imbestigador sa Compostela police, niasoy sa Sun.Star Superbalita nga ang biktima nagtan-aw sa disko subay sa kapistahan sa ilang lugar.
Samtang nagbarog diha sa gawas sa diskuhan uban sa mga higala, laing tulo ka mga batan-on ang ningduol ug usa kanila ang kalit nga nipusil sa ulo sa biktima ug dayong sibat palayo sa maong lugar.
Ang batan-ong si Basay didto sa sulod sa diskuhan nga nagsayaw ug naangol human ang bala sa armas nga nilapos sa ulo sa biktima nipatubang kaniya.
Matud ni PO2 Goc-ong, duna silay mga testigos nga nakaila sa tulo ka mga suspek nga gikatahong sakop sa Alpha Kappa Rho (Akrho) nga maoy namusil sa biktima.
Gipadayag niini nga tataw nga usa kini ka “frat war” apan, nagduda ang kapulisan nga ang biktima posibling naalaan lang nga sakop sa kontra nga fraternity.
Sumala pa niini nga walay record nga dunay fraternity affiliation ang biktima ug ang iyang upat ka mga barkada nga uban samtang nag-inom diha sa usa ka lamesa gawas sa diskuhan.
Ang ilang mga testisgos positibong niila sa tulo ka suspek nga sakop sa Akhro apan ang saksi sa pagkakaron naa pa kini sa “state of shock” hinungdan nga ila pang kuhaag dugang impormasyon.
Duha ka kinabuhi ang nakalas niadtong miaging mga adlaw didto sa dakbayan sa Carcar human gipangrakrakaran sa mga gituhoang meyembro sa fraternity.