DI KO kahinumdum kon duna bay nahitabo dinhi sa Sugbo nga susama sa nahitabo niadtong Dominggo sa bag-o lang gisugdan nga National College Athletic Association (NCAA) basketball tournament sa Kaulohan.
Ang San Beda Lions ubos sa ilang coach nga si Ronnie Magsanoc aduna lay unom ka mga players nga nakigsangka sa Arellano University Chiefs.
Kini tungod kay ang laing unom ka mga players gipangsuspenso man og usa ka duwa isip silot sa ilang pagkalambigit sa karambola sa niaging tuig atol sa usa ka duwa sa women’s volleyball event tali sa San Beda ug San Sebastian.
Pero kahibawo mo og unsay nahitabo? Gipildi ang kompletong Chiefs ni rookie coach Koy Banal sa unom ra ka mga players ni Magsanoc.
Perming naglabaw ang Arellana sa first two quarters apan sa kalit lang mipaulbo ang San Beda og rally aron langkaton ang labaw, 63-54, sa third quarter. Didto nagsugod og kasalimo-ang ang Chiefs.
Sa tunga-tungang bahin sa fourth quarter, lima na lang ka mga Lions ang nahabilin sa San Beda human ma-fouled out ang usa niini nga si Antonio Bonsubre.
Pero bisan pa man niini, wa mawad-i og determinasyon ang fighting five ug wa gyuy nahimo ang Chiefs ug hangtod nahuman ang duwa sa score nga 81-71.
Tinuod, no title at stake, di kabahin sa finals series ang panag-engkuwentro ug di knockout match ang duwa, kay bag-o pa laging gisugdan ang torneyo, pero this one is for the record.
Lisod ning papason sa panumduman sa mga basketball fanatics. It’s a history in Philippine basketball.
Di ikasurprisa kon under scrutiny ang pag-coach karon ni Banal sa Chiefs.
Samot kay giingong ang fighting six sa Lions mga second stringers ra diay sa San Beda lineups.
*******
Nagselebrar kagahapon ang 2012 NBA Champions Miami Heat sa ilang kampiyonato uban sa mga fans nga naglinya daplin sa kadalanan samtang miparada ang kinatibuk-ang puwersa nga nagsakay sa double-decker bus.
Kini maoy ikaduhang NBA title sa maong franchise apan unang kampyonato sa Big 3 nga sila si LeBron James, Chris Bosh ug Dwyane Wade.
Hinuon kini maoy ikaduha na ni Wade kinsa maoy nangulo sa Heat niadtong 2006 championships.
Target sa Big 3? Back-to-back title, next year, a very possible thing.
(junmigs0622@yahoo.com)