KIDAPAWAN CITY - Gibuhian na sa mga armadong grupo ang gidagit nga estudyante alas 10 sa gabii niadtong Martes.
Gikanayon ni 6th Infantry Division Public Affairs chief Colonel Prudencio Asto nga gibuhian na si Angeline Ferenal, 17, 4th year high school ug molupyo sa Barangay Pagangan, Aleosan sa mga kidnaper nga midagit kaniya.
Ang pagbuhi nahitabo didto sa utlanan sa munisipyo sa Pikit ug Aleosan gumikan sa gihimong negusasyon ug way puas nga operasyon sa militar ug kapulisan.
Nanguna sa negusasyon mao sila si Cotabato Governor Emmylou Talino Mendoza, Aleosan Mayor Loreto Cabaya, Pikit Mayor Sumulong Sultan, mga pangulo sa Muslim ug mga opisyal sa Moro Islamic Liberation Front (MILF).
Gisaysay ni Ferenal nga gitaptapan ang iyang mga mata ug nagbalhin-balhin sila og sakay og motorsiklo.
Gitug-an sab sa biktima nga bulad ang gipasud-an sa mga midagit kaniya. Sa payag-payag ra sab sila mangatulog.
Dugang ni Ferenal nga bisan ang mga suspetsado nabalaka sa ilang kaugalingon gumikan sa nagpadayon nga operasyon sa militar ug kapulisan, lakip na ang tabang sa MILF hinungdan nga siya gibiyaan na lamang daplin sa kalsada.
Kahinumdoman nga niadtong adlaw nga Lunes, alas 7 sa buntag, gidagit ang biktima sa duha ka wala mailhing lalaki ug gisakay sa habal-habal nga motorsiklo samtang paingon unta siya sa Pagangan National High School.
Wa hinuon matino kon mibayad ba og ransom ang pamilya sa biktima ngadto sa mga kidnaper aron nga buhian siya. (Edgardo Fuerzas)