BISAN wa pa ang Republic Act 10666 nga nagdili sa mga bata sa pag-angkas og motorsiklo, ang Siyudad sa Sugbo duna nay ordinansa alang niini.
Niadtong Nobiyembre 17, 2004, gipalabang sa konseho ang ordinansahon ni kanhi konsehal Eugenio “Jingjing” Faelnar nga nagdili sa mga bata nga nagpanuigon og 7-anyos paubos sa pag-angkas sa motorsiklo ug biseklita.
Ang bata nga moangkas gikinahanglan nga makagakos sa nag-drive sa motorsiklo.
Ang ordinansa giulohan og “An Ordinance Prohibiting the Carriage of a Child or Children Below 7 Years of Age on Board a Motorcycle, Motorized Scooter or Bicycle or Any Form of 2-wheeled Wehicle.”
Gitumong kini alang sa kaluwasan sa mga bata.
Ang multa mas ubos kay sa R.A. 10666.
Base sa ordinansa, ang makalapas niini pamultahon og P200-P500.
Kon di man gani, bilangguon og labing minos usa ka buwan, apan di molapas og tulo ka mga buwan.
Sa nasudnong balaud, gidid-an usab ang mga bata sa pag-angkas sa motorsiklo kon ang ilang mga tiil di makatugkad sa tungtunganan.
Gikinahanglan usab nga sila magakos sa hawak sa driver.
Nagtangag og multang P3,000-P10,000 ang mga makalapas sa mao nga balaud nga gipirmahan ni Presidente Benigno Aquino III niadtong Hulyo 21 ning tuiga.
Ang labing bug-at mao ang pagkanselar sa lisensya sa driver.
Si Jonathan Tumulak, operations head sa Cebu City Transportation Office (CCTO), nagkanayon nga wa sila nitutok sa pagpatuman sa ordinansa gumikan sa tawhanong rason.
Inay, ilang pahimangnoan ang mga drayber nga mag-amping ug palitan og helmet ang ilang sakay nga bata aron paglikay sa disgrasya.
Matod niya nga ilang nasabtan ang sitwasyon sa dakbayan diin ang paggamit og motorsiklo maoy madali-dali sa mga tawo aron ihatod ang ilang mga bata sa eskwelahan panahon sa tigtungha.
“So far, sa pagkakaron, wa gyud ta mohugot og dinakpanay. Pero ang amo gibuhat, once dunay magmotor, amo pahimangnoan ang driver. Amo gilikayan nga makadungog ang bata nga dakpon ang iyang amahan kay maka-cause og trauma sa bata,” pasabot ni Tumulak.
Iyang gibutyag nga pag-abot sa panahon nga ipatuman na ang RA 10666 nga, ang Land Transportation Office maoy mopatuman niini samtang sila sa CCTO magpadayon sa ilang trabaho.
“Makasabot man sad mi sa sitwasyon diin ang mode of transportation mao ang motor, mao nga papalitan lang nato og helmet ang mga bata aron aduna silay protection,” pasabot ni Tumulak.