BACOLOD

Espinoza: Luoy ang katawhan

MANIOBRA? Kon nakama­tikod mo, sukad mibiya si Cebu city Mayor Mike Rama sa BO-PK ni Kong. Tomas Osmeña, wa nay ayo ang serbisyo sa dakbayan sama sa way klarong kolekta sa basura ug ang trapiko haskang gubota.

Duha ra ka rason ang akong gituhoan nga maoy hinungdan. Una, ang konseho, nga dominado sa BOPK, wa mohatag kompiyansa ni Mayor Rama, ug ang ikaduha, dunay mga alipores si Tomas sa City Hall nga sekretong nagtrabaho nga mahugno ang mayor.

Ang pagbiya ni Mayor Rama sa BOPK human siya mahimong mayor masakit alang kang Kongresista Tomas tungod kay alang kaniya usa to ka pagbudhi. Lisod lamuyon ang kamatuoran nga gibiyaan si Tomas ni Mayor Rama.

Ang konseho, tungod sa mando ni Tomas, di gyud motugot nga makalihok ug makagamit si Mayor Rama og kwarta sa panudlanan sa dakbayan. Samot na nga si Mayor Rama di makabaligya og yuta diha sa SRP.

Ingon ani ang duwa sa pulitika. Pung pa ni anhing Mano Amon Durano, ang pulitika duwa sa mga yawa. Kon ang dakbayan nag-antos ron sa kahugaw, labina inig human sa ulan, ug sa kakuwang sa serbisyo, kini tungod sa away nila ni Tomas ug Mayor Rama.

Naay gihimong kanal diha sa eskina sa Hi-way 77 ug St. Anthony’s Village sa Talamban, nga gisugdan niadtong buwan sa Nobiyembre 2011 hangtod karon wa pa gihapon mahuman.

Nag-antos ang taga sulod sa St. Anthony’s village matag ulan kay mobaha dayon tu­ngod sa kakuwang sa drainage.

Si Mayor Rama bisag un­saon niya og pangisog kutob ra siya diha kay ang mayoriya sa konseho tua ang loyalidad ni Tomas kay pulos ni sila nakautang og kabubut-on ni Tomas sa miaging piliay.

Naay problema sa trapiko nga haskang grabeha labina sa ting-uli sa eskuyla ug trabaho sa hapon. Way nahimo ang Citom. Si Jack Jakosalem, ang tsirman sa Citom, igo lang moingon nga normal ra ang trapiko ron. Ang iyang buot ipasabot nga normal nga pirming gubot.

****

PROBLEMA. Ang problema sa Cebu City kay si Mayor Rama ug ang konseho dili na magkauban. Apan ang sa dakbayan sa Lapu-Lapu nga magkauban tuod ang ehekutibo ug konseho apan wa say makitang kaayohan.

Naay daghan paagi nga maimprobar ang trapiko sa Lapu-Lapu apan ang nagdu­mala wa man makalantaw sa angayan nga buhaton. Ang unang tulay sa Mactan-Mandaue nga duha ra ka linya sa trapiko hangtod karon wa pa mahatagi og maayong pagtagad sa duha ka dakba­yan ug sa DPWH.

Ang katawhan morag wa pa makakita sa agi ni Kong. Boy Radaza ug asa niya gigasto ang iyang dakong CDF. Naa pay daghan dalan nga gagmay ug gubaon pa gyud ang dakbayan. Ang bana kongresista ang asawa mayor, apan unsay inyong nakitang kausaban sa dakbayan?

Klaro man nga di ko enhenyero apan kon ako pa si Kongresista Radaza akong pa­butangan og flyover ang interseksyon duol sa unang tulay aron lahus-lahus ang dagan sa mga sakyanan.

Pagka dako sa CDF ni Kongresista Radaza apan wa gyud siya makahunahuna og gahin og badyet aron pag-improbar sa trapiko sa unang tulay. Ang opisyales sa DPWH wa na lang sad magpakabana sa grabeng trapiko sa unang tulay.

Ang DPWH mao ni usa sa mga ahensya sa gobyerno nga nailhan nga kurakot. Ambot kaha karon sa “matuwid na daan” ni President Noy Aquino og nausab o natul-id na ba ang dagan sa panan-aw sa taga DPWH?

Unsaon kahay mahitabo kon ang katawhan di na lang magpakabana? Way tarong dalan, ang basura di na makolekta, ang mga drayber di na motuman sa lagda sa trapiko.

(elespinoza53@yahoo.com)
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph