KIDAPAWAN CITY - Usa ka municipal councilor ug babayeng clerk of court ang gipusil patay sa managlahing lugar hapon niadtong Martes.
Ang kanhi konsehal nga gipatay alas 4:40 sa hapon sa maong adlaw, giila nga si Taac Acdal, 56, minyo, ug molupyo sa Barangay Poblacion, Pikit.
Gibutyag ni Kabacan Chief of Police Senior Inspector Elias Dandan nga pagawas na si Acdal sa iyang tindahan sa merkado publiko sa Pikit aron nga mopauli sa dihang nahitabo ang pagpamusil.
Sumala pa nga duha ka mga wala mailhing lalaki ang miduol ug dayong nagpusil kaniya gamit ang kalibre .45 nga pistola.
Mga mamumuno dali nga misibat sakay sa walay plaka nga Honda XRM nga motorsiklo paingon sa wala matino nga direksiyon.
Si Acdal dali nga gitabang sa iyang mga paryente ug gidala sa Cruzado Hospital apan gideklara siya sa mga attending physician nga patay na.
Ang biktima nakaangkon og samad pinusilan sa ulo, likod, dughan ug tiyan nga maoy hinungdan sa iyang kamatayon.
Samdan sab ang usa ka Macmod Calim nga naigo sa mga saag nga bala samtang nagtindog duol sa nahitaboan.
Dako ang pagtuo ni Mayor Sumulong Sultan nga posibling personal nga atraso o rido ang motibo sa pagpatay sa biktima.
Samtang patay sab sa tambalanan ang clerk of court human gipusil usab sa mga mamumuno nga nagsakay og motor alas 5 sa hapon sa maong adlaw.
Nailhan ang biktima nga mao si Lorena Nabaira, 26, minyo, Clerk of Court sa Regional Trial Court 12 Branch 22 sa Kidapawan ug molupyo sa Barangay Banawag, Kabacan.
Nasayran gikan kang Kabacan Chief of Police Supt. Raul Supiter nga sakay si Nabaira sa usa ka traysikad gikan sa iyang gitrabahoan ug pauli na sa balay sa diha nga gipusil sa mga suspetsado.
Ang mga mamumuno abtik sab dayon nga nakaiskapo sakay sa walay plaka nga Honda XR 200 nga motorsiklo paingon sa wala matino nga dapit.
Daling gitabang si Nabaira ug gidala sa nagrespondeng pulis didto sa Kabacan Medical Specialist Hospital.
Apan pipila ka minutos ang milabay, gideklara siya sa mga attending physician nga nakabsan sa kinabuhi gumikan sa grabeng samad pinusilan sa ulo ug dughan.
Ang mga empleyado sa RTC sa Kabacan nagsulti nga maayong tawo si Nabaira ug wala silay namatikdan nga kaaway niini.
Sa kasamtangan, padayon pa nga gisusi sa kapulisan ang duha ka mga panghitabong pagpamusil didto sa probinsiya sa North Cotabato.