GIPAHIMANGNOAN ang mga motorista ilabi na niadtong adunay gikatakda nga flight sa Mactan-Cebu International Airport Authority sa adlaw’ng Dominggo nga mosayo sa ilang pagbiyahe aron nga dili mahasol sa pagsira sa duha ka taytayan sa Mandaue ug Mactan gumikan sa pagpahigayon sa Ironman.
Sa giluwatang traffic advisory sa Lapu-Lapu City Traffic Management System (CTMS) nga ang una ug ikaduhang tulay sa Mandaue ug Mactan sirhan gikan sa alas 5:00 sa buntag ngadto na sa alas 12:00 sa udto.
Samtang ang right lane sa Marcelo Fernan Bridge kon mag-atubang sa dakbayan sa Mandaue ang kasamtangan nga himuong two-way traffic sa mga motorista nga mopaingon o mobiya sa Lapu-Lapu.
Sanglit ang left lane sa ikaduhang tulay maoy gamiton sa Ironman participants alang sa lumba sa biseklita nga manukad sa barangay Pusok, lagbas sa Mandaue City lahos sa dakbayan sa Talisay.
Gipahibawo kadtong mopaingon o manukad sa tugpahanan sa Mactan nga mosubay sa gitagana nga alternative routes sama sa paggamit sa Sangi-Matumbo road o ang access road sa sa Mactan Benito Ebuen Air Base.
Ang kalsada nga nanukad sa barangay Punta Engaño ngadto na Pusok diha sa may Goldberry Suites Hotel ang sirhan gikan sa alas 5:00 sa buntag ngadto na sa udto, samtang ang habig sa Punta Engaño lahos na sa Amisa Condominium ang buksan sa alas 3:30 sa hapon.
Mipahibawo usab ang CTMS ngadto sa mga sumasakay gikan sa barangay Mactan nga mosakripisyo og lakaw paingon sa Angasil Access road diin nagpaabot ang mga Filcab nga paingon sa Poblacion area.
Gikinahanglan nga ang mga motorista mosubay sa Mactan-Marigondon-Basak Road paingon sa ilang tagsa-tagsa ka mga destinasyon.
Nasayran nga ang pagpahibayon sa Cobra Energy Drink Ironman 70.3 Philippine maoy labing unang higayon nga nahimong host city ang Lapu-Lapu nga adunay 1,700 ka mga atleta ug 40 porsiyento niini mga langyaw.