USA ang namatay samtang duha ang nangaluwas sa tulo ka mga tinun-an sa hayskol nga nangaligo kagahapon sa alas 10:30 sa buntag sa dagat sa Sitio Sawmill Barangay Langtad, dakbayan sa Naga.

Si Marjun Canque, 16, taga Barangay Pitalo, lungsod sa San Fernando, tinun-an sa 2nd year high sa Langtad National High School, patay nang napalgan mga a­­las 2:30 kagahapon sa ha­pon human siya na-missing.

Nakalingkawas sa kamatayon ang iyang duha ka classmate nga sila si Annabelle Dejito, 14, taga Sitio Guiwanon, Langtad, Naga City ug Panny Car Lastimosa, 14, taga Barangay Pitalo, lungsod sa San Fernando.

Si PO2 Ronjie Nadorra, desk officer sa Naga police nga nahinabi sa Sun.Star Superbalita, nagkanayon nga mga alas 9 sa buntag kagahapon sayo nga nahuman ang periodical exam sa mga biktima.

Nagkuyog gilayon ang walo ka mga tinun-an ug nakahukom nga mangaligo sila sa dagat, apan sa pag-abot sa maong dapit ang duha nila ka classmate wa mopadayon sa pagkaligo.

Matod pa ni Nadora nga ang mga biktima didto sa may dike ug si Marjun maoy unang niambak sa dagat, kinsa nahilayo gilayon kay naanod sa sulog sa tubig.

Nisunod sa pag-ambak si Annabelle ug dayon si Panny Car, kinsa nikapa-kapa kay di makahibawo nga molangoy.

Tungod niini si Annabelle nga naluoy iyang gilangoy si Panny Car ug gitabang apan gilayog siya niini hinungdan nga silang duha nangaunlod sa dagat.

Si Marjun nga nakakita sa sitwasyon daling nilangoy aron unta iyang luwason ang duha.

Apan wa siya makaabot ug kalit lang siyang na­anod ug wa na makit-i.

Usa ka Danilo Librero, 27, ulitawo, maoy nakakita sa mga biktima hinungdan nga gitabang niya sila si Annabelle ug Panny Car.

Ang mga biktima gidali sa pagdala sa South General Hospital (SGH) sa dakbayan sa Naga, samtang si Annabelle gibalhin sa Vicente Sotto Memorial Medical Center (VSMMC).

Si Nadorra niingon nga ang mga bombero sa lungsod sa San Fernando, Philippine Coast Guard nga nakabasi sa Naga, kapulisan ug mga volunteer nagtinabangay sa pagpangita kang Marjun.

Apan patay na siya dihang napalgan mga alas 2:30 sa hapon human mi­hunas na ang dagat diha sa maong dapit.

“Ang sulti-sulti sa mga residenti sa lugar, mao lagi na gipang-ukoy daw ang mga bata maong nangalumos pero dili mi motuo sa u­koy kay wala man mi ma­kakita,” dugang ni Nadorra.

Gipadayag niya nga digrasya ang nahitabo sa mga biktima.

Sa pikas bahin 3- anyos nga batang lalake namatay human nadasmagan sa motorsiklo dihang kalit nga nilabang sa national highway niadtong Huwebes sa ala 1 sa hapon sa Barangay Puente, lungsud sa Carmen.