“IT’S even bigger, more colorful, more grand and with more participation with now over 450 exhibitors. That’s the biggest so far. And this is the best participated.”
Mao kini ang paghulagway ni Gobernador Gwen Garcia dihang opisyal nga gibuksan ang One Cebu Expo kagahapon sa Cebu International Convention Center (CICC).
Matod niya moabot ngadto sa 450 ka mga exhibitors ang ningsalmot sa ikalima ka tuig karong 2012 nga mas daghan kon itandi sa nangaging katuigan.
Ang gobernador kauban ang manghod nga si Kongresista Pablo John Garcia (ikatulong distrito) maoy nangu sa ribbon cutting uban sa mga bisita sama ni Batangas Vice Gov. Mark Leviste.
Si Bise Gobernador Agnes Magpale wa makatambong sa kalihukan.
Sa iyang pagpamulong, nibalik lantaw ang gobernador niadtong 2008 dihang nasinati ang recession sa kalibutan ug ang mga local ug domestic market dili pa andam sa mga produkto nga pang world-class.
Si Garcia mapasigarbuhon nga dako na ang kalainan sa One Cebu Expo karon kon itandi niadtong 2008.
“Now this fifth year…the exhibitors themselves who have to beg to be given a spot, a stall, and a booth to be included in the One Cebu Expo,” saysay niini.
Niadtong 2010, mikabat sa 333 ka exhibitors ang mga nisalmot samtang 365 sa miaging tuig.
Karong tuiga, dunay 22 ka mga local government units sa lalawigan sa Sugbo ang niapil sa One Cebu Expo ug nagbutang sa ilang tagsa-tagsa ka booth.
Pipila sa mga produkto nga makita ang pickled vegetables sa Dalaguete, charcoal briquette sa Tabogon, table sa Sogod, furniture sa Alegria, kropec fish products sa Bantayan, cultured crab sa Carmen, takyong o tree snail sa Borbon ug uban pa.
Ang uban niini bunga sa Obra Negosyo Eskwela sa panagtambayayong sa mga local manufacturers ug entrepreneurs kauban ang mga tinun-an sa kolehiyo ug nagkadaiyang chambers of commerce and industry sa Sugbo.
Makita usab og apil ang mga fashion accessories, gift toys, delicacies, house wares ug furnitures nga pang world class nga ipang-display hangtod sa Agusto 13.
Si Bayan Muna party list Representative Teddy Casiño dunay booth gawas sa plenary hall nga gitawag og “Buy Pinoy, Build Pinoy nga nagkampanya sa pagpalit sa kaugalingong mga produkto gikan sa Pilipinas.
Kini ang unang higayon nga ang Hotel, Resort and Restaurant Association of Cebu (HRACC) ang nagpahigayon og culinary arts, exhibition and competition.
Duna usay car show gawas sa CICC.
“All sectors are represented students, mga kabataan, academe, consular corps, we have also our officials, micro small and medium enterprises,” dugang sa gobernador.
Ang One Cebu Expo kabahin sa usa ka buwan nga kasaulogan sa ika-443 nga founding anniversary sa lalawigan sa Sugbo.