WA pa gani masulbad ang duha ka mga ambush nga insidente sa dakbayan sa Carcar sulod ning simanaha, laing kinabuhi na sab ang nakalas sa laing ambush niadtong Biyernes sa alas 8:15 sa gabii sa Sitio Danao, Barangay Valencia sa mao nga siyudad.

Si Segundo Dayanan, 66, biyudo, sakop sa Lungsud Batok Salaod (LUBAS), taga Barangay Esperanza, lungsod sa Aloguinsan, dead-on-arrival (DOA) sa Carcar District Hospital human makaangkon og samad pinusilan sa ulo.

Kritikal ang iyang gikapuyo nga si Angelina Ibanan, 50, taga Barangay Labangon, dakbayan sa Sugbo, kinsa nakaangkon og mga samad pinusilan sa iyang kalawasan.

Love triangle ang gisusi sa kapulisan.

Si PO2 Rosendo Binondo, imbestigador sa Carcar Police nga nahinabi sa Sun.Star Superbalita, nagkanayon nga si Segundo ni-apas sa iyang gikapuyo nga si Angelina nga nanglaba sa ilang mga sapot sa balay sa ilang higala nga si Carmelita Alforque.

Si Angelina didto manglaba sa balay sa ilang higala sanglit ang ilang tabay sa Aloguinsan gikatahong lubog.

Ang nahimutangan duol ra sab sa ilang lugar gumikan kay duol ra ang boundary sa duha ka mga dapit.

Pagka-alas 7 sa gabii niadtong Biyernes, si Segundo niabot sa nahisgutang kay niapas kang Angelina.

Didto na sila nanihapon sa balay sa ilang higala.

Human sa ilang pagpanihapon, nakahukom silang mamauli.

Sa ilang pag-abot sa awaaw nga lugar sa Sitio Danao, Barangay Valencia, kalit silang gipamusil.

Si Binondo niingon nga si Angelina nakadagan pa ug nakapangayo og panabang sa ilang mga silingan duol sa crime scene sanglit ngitngit kaayo ang lugar nga nahitaboan.

Apan ang mga residente sa dapit, dihang gipangayoan og panabang sa babaye nga biktima, wa dayon manggawas sa kahadlok nga silay pamusilon kay ngitngit.

Pipila ka minutos, dunay niaging pribadong sakyanan hangtod nga niresponde ang mga pulis.

Way kabhang didto sa crmine hinungdan nga nagtuo ang mga pulis nga revolver ang gigamit sa suspek sa pagpang-ambush.

Gibutyag ni Binondo nga sa pagkakaron ilang gitutukan ang duha ka mga motibo nga mao ang love triangle, ingon man personal nga motibo.

Hinuon ang bana sa anak ni Angelina nibutyag nga dugay nang nagpuyo ang duha nga moabot na og 10 ka mga tuig human nagkabuwag sa iyang bana.

Ikaduhang motibo ang personal grudge sanglit si Segundo, gikatahong dunay gipasakaan og kaso nga usa ka tawo diha sa piskaliya sa dakbayan sa Carcar.

Kini may kalambigitan sa swindling, estafa ug malversation.

Hinuon gipalawman pa nila og maayo ang imbestigasyon lakip na ang pagkasakop sa biktima isip anti-crime volunteer.