Sugilanon: Ug naayo si Bador

Bartolome Man. Panilagao

Lacaron, San Fernando, Cebu

MAOY namat-an ni Inse Imak ning sayong kaadlawon ang pagpunay og yawyaw ni Ingko Bador sa mga pulong nga sagol pamalikas.

“Hunonga na intawon kanang imong gipanulti, Bador, kay basin hibatian kita sa atong mga silingan!” ni Inse Imak ngadto sa iyang bana.

“Kinsa ka nga mobadlong kanako? Wa ako makaila kanimo!” mitaas pagsamot ang tingog ni Bador. “Gusto ko og kamatay!”

Misawop na lang ang adlaw apan way hunong ang pagyawyaw ni Bador. Ingon nga nagsalimuang. Nahinumdoman ni Inse Imak nga sa miaging semana kanunay kabuntagan ang iyang bana sa hantakan nga way sulod ang tiyan. Modayon man kini og yampungad sa hantakan nilang Piolito Biyana. Unya mangutang pa gyud og ginalon nga bahalina. Nagduda si Inse Imak nga nahiubos ang iyang bana dihang gipasidan-an niya nga kinahanglan sila magpuasa sa ilang romansa.

“Sugod karong adlawa, Bador, ayaw una pagpakabuang og tupad kanako sa lantay sulod sa atong sibay, kay hapit na moabot og usa ka dosena ang atong mga anak. Mosamot ang atong kalisod sa pagpakaon kanila!”

Sukad niadto kanunay na hibuntagan si Ingko Bador sa hantakan, ug hubog kini kanunay inigpauli sa balay.

Ning ilang dapit sa balangay sa Kalapayan dali ra nga nabaniog ang bisyo ni Ingko Bador, ang iyang pagka sugarol ug pagka palahubog.

Kalit nga nahagtos ang ang paghanduraw ni Inse Imak dihang may gisulti si Ingko Bador. “Unsa ba tuod kadto imong ngalan? Wa man gyud ako makaila kanimo,” matod ni Ingko Bador.

Naklaro ni Inse Imak nga nalisuan sa tornilyo ang iyang bana. Taudtaod na god silang duha nga nagtipon isip magtiayon, ug ngano man nga wa na man kini makaila kaniya?

Naahat si Inse Imak pagbaligya sa iyang anay nga umaanak aron ipa-ospital sa iyang bana nga nawad-an na sa ensakto nga panimuot. Sa ospital giatiman si Ingko Bador ni Doktora Nancy. Apan bisan giunsa na pagpahigayon ni Doktora Nancy pinaagi sa pagpatomar kang Ingko Bador og mga tambal, sahi sa gihapon nagpabilin kini nga nagsalimuang. Nagkasamot na hinuon kay ang mga mata niini kanunay magliraw-liraw.

“Di gyud tiaw akong kahibulong, Inse Imak, nga sa kadaghan na nakong pasyente nga mga buang, sila pulos man nangaayo sa akong pagtambal,” ni Doktora Nancy. “Eksperto go ako sa sakit sa mga buang. Apan wa man maayo si Ingko Bador. May gisugyot siya kang Inse Imak.

Halawom na ang gabii. Hapit tanang pasyente sa ‘ward’ nangatulog na, gawas ni Inse Imak. Gipikpik og hinay ni Inse Imak si Ingko Bador nga nahinanok na. Sumala sa sugyot ni Doktora Nancy, gihubo niya ang tanan niyang sapot ug miatubang sa iyang bana nga karon nagkipat-kipat na ang mga mata.

“Nakakita ka niini, Bador?” ni Inse Imak nga midumol sa iyang bilahan paduol sa mga mata ni Ingko Bador nga nagtuo nga si Doktora Nancy ang iyang nakita..

“Oo, Doktora, nakakita ko. Mas ugdo pa kini kaysa kang Imak,” nagkatawa si Ingko Bador nga mitubag. Apan usa ka kusog nga tamparos milandig sa iyang nawong.

“Nakaila ka kanako, Bador?” singgaak ni Inse Imak.

“Imak! Ikaw diay?” ni Ingko Bador nga kalit naayo gikan sa iyang sakit nga salimuang. (KATAPUSAN)