Nagkaduol na ang 2013 nasiyunal ug lokal eleksiyon. Duha na lang ka bulan ang latason ting-file na sa Certificate of Candidacies (COCs) sa mga kandidatong buot mohupot sa lokal ug nasiyunal nga posisyon.
Dunay mga kandidato nga andam na, aduna say nagduha-duha kon mokandidato pa ba o dili na. Si Mayor Sara Duterte-Carpio, hangtud karon wala pay disisyon kon magpasubli pa ba pagka- mayor o dili na.
Iyang gibarogan ang una niyang gipamulong sa media sa milabay nga panahon nga mas gusto niyang magsabak kay sa magpasubli sa pagka-mayor. Ug hangtud karon wala mabalhin ang iyang paghukom.
Ang iyang unang rason, health, ug ikaduha, funding.
Sa health, tingali makatuo ta, pero sa funding wala silay problema kay may mga milyon naman sila sigun sa ilang gideklara sa Statement of Assets and Liabilities and Networth (SALN).
Ikaduha, ang mga suporters sa mga Duterte sa ilang pamolitika sulod na sa 24 ka tuig karon, dili gyud na mobiya nila sanglit nakapahimulos sila sa administrasyon sa mga Duterte hangtud karon.
Kinsa man kunoy moparang nga politiko dinhi sa Davao karong panahona? Kon dili na mobalik si Inday Sara sa City Hall, dili na problema kay ang amahan nga si Vice Mayor Rody may katakos pa nga magdumala sa atong siyudad, ug kon dili man anaa si Paulo "Polong" Duterte.
Matud pa sa akong amigo nga anaa sa mga Duterte, kon dili magpatudlo ug nasiyunal nga posisyon si Inday Sara, may posibilidad nga atbangan niya ang Congressman sa unang distrito nga si Karlo Bendigo Nograles.
Ang problema lang kay lisod mapukan si Congressman Karlo tungod sa mga maayong performance nga iyang nahimo sa iyang distrito, ug labaw sa tanan may agi usab siya didto sa Kongreso.
Dako ang atong pagtuo nga dili hakgumon sa mga Duterte ang dagkong political position sa atong dakbayan, kon ilang nakita nga nagtrabaho ang usa ka politiko bisan kon dili nila kini kadugo.
Dako nag kausaban ang atong siyudad sa Davao sukad niadtong tuig 1988 kon diin unang nangatungdanan si Rody Duterte pagka-mayor. Sulod sa 24 ka tuig sa iyang pagka-politiko nagkalandrakas ang mga isyu nga gibato ngadto kaniya, pero, nagpabilin siya hangtod karong panahona.
Nagpasabot lamang kini nga wala pa mohupas ang kagustohan
sa mga katawhan ngadto sa sa mga Duterte. Ila kining destinasiyon, kon kanus-a mawala ang ilang pagdominar sa atong dakbayan, panahon lang ang makatubag nianang tanan.
Alang sa ubang mga politiko, paabuta ang inyong panahon, kay sa atong pagpaniid ang 2013 eleksiyon Duterte lang gihapon.
Paminawa ang KONTRA BALANSE sa DXKT 1071 Khz 7 - 9 a.m. Lunes hangtod Sabado, ug ang RPN Visayas Mindanao Koneksiyon.