Wa'y makalas nga kinabuhi

MOBULHOT karong adlawa ang 2nd Cebu Challenge 443rd Founding Anniversary Cycling Classic sa SRP dala ang pasalig gikan sa mga nag-organisar nga wala’y kinabuhing makalas.

Sa press conference kaga­hapon sa Cebu Grand Convention Center, si Cebu cycling patron David Odilao Jr. ug race director Joe Deresas nag-usa sa pag-ingon nga dili mahitabo sa Cebu Challenge ang nahitabo sa ba­g-u­hay lang nahuman nga Cobra Energy Drink Ironman 70.3 Philippines.

Usa ka triathlete nga apil sa Ironman race ang namatay human kini natumba gikan sa iyang gisakyang bisikleta sa Cansojong, Talisay City.

Sa utopsiya, nasuta nga ang hinungdan sa kamatayon ni Ramon Igaña, 44, mao ang iyang sakit nga acute pulmonary embolism diin adunay nakit-ang pipila ka blood clots sa iyang baga.

Gipaneguro ni Deresas nga ang tanan nilang mga partisipante pulos himsog ug dili kini nila tugtang makalumba kon aduna kini sakit.

“Kining atong participants pulos gyud ni physically fit kay continuous man gyud ang ilang training ani,” batbat ni Deresas.

Sa iyang bahin, si Odilao, kanhi customs collector ug amahan sa daghan ug dagkong lumba sa biseklita dinhi sa Sugbo, nipasabot nga sa dili pa magsugod ang lumba, ipaubos gyud nila sa medical check-up ang ilang mga partisipante.

“We have the Red Cross, the Eruf and other medical personnel nga mo-check sa atong riders before sa race,” asoy ni Odilao.

Sa laing bahin, matod ni Odilao nga mga 12 unta ka teams nga adunay lima ka siklista matag usa ang ilang gilaumang mosalmot sa lumba apan gumikan sa bagyong si Gener nga miigo sa Manila, hayan upat ka teams ang wala nadayon.

“Unfortunately because of Gener, we have only now eight teams,” asoy ni Odilao.

Bisan sa kakulian nga miigo sa Cebu Challenge, si Odilao pa­­dayong nanghinaot nga ma­tuman nila ang ilang tinguha nga makakaplag og bag-ong mga siklista nga adunay potensyal nga makahatag og dungog sa nasod sa ugma damlag.

“Dili pareha sa ubang dag­kong race nga gidala diri sa atoa for business reasons, kining atong Cebu Challenge para gyud ni maka-discover ta’g new names in cycling,” pasabot ni Odilao.

Magsugod ang lumba pinaagi sa Individual Time Trial (ITT) nga ipahigayon human sa opening program sa alas 8:00 sa buntag sa Sugbu sa SRP.

Ang mopatigbabaw sa ITT mao na dayon ang magsul-ob sa yellow jersey alang sa Stage 1 nga ipahigayon sa Bogo City.

Ang Stage 2 ipahigayon sa Toledo City, ang Stage 3 sa lungsod sa Argao dayon ang Criterium ipahigayon sa Mandaue City.