2 gikawatan og iPhone

DUHA ka mga babaye ang nawad-an og mahalon nga iPhone niadtong Lunes sa maglahing dapit sa Divisoria ning siyudad sa Cagayan de Oro.

Unang nagpatabang sa Police Station 1 (PS1) sa Divisoria mao si Haney Shane Legarda, 21, dalaga, sales lady sa dakong mall sa Upper Carmen ug residente sa Barangay Carmen.

Gisaysay sa biktima nga day-off niya niadtong tungora ug nagkuyog sa iyang higala sa Divisoria kay adunay paliton, apan samtang naghupot og iPhone kalit lang nga gibira sa iyang kamot hinungdan nga gisuwayan pa nila og gukod.

Apan nalipat ang biktima ug kalit nga nawala sa ilang panan-aw ang suspek. Gibutyag sa biktima nga plan lamang ang maong iPhone ug aduna pa siya usa ka tuig nga bayaran kini.

Samtang lain biktima nga mao si Jerome Gumalang, 23, ulitawo, lumad nga taga siyudad sa Iligan ang nawad-an gihapon sa iyang iPhone nga cell phone.

Nagtuo ang biktima nga gikawat kini sa iyang bag samtang sakay og Patag liner paingon na unta niadtong tungora sa Divisoria.

Imbes unta adunay kitaon nga higala, wala na hinuon niini makontak human pagsusi sa bulsa sa iyang bagpack wala na ang iyang iPhone.

Deretso ang biktima sa PS1 ug nagpatabang. Ang kaso gisunod na sa kapolisan niining panahona. (SVB)