MANILA - Labing minos walo ka mga tawo ang nangamatay ug 800,000 ka mga tawo ang apektado sa baha nga dala sa Habagat sa Metro Manila ug kanait nga mga lalawigan, matod sa official data sa kagamhanan.

Ang National Disaster Risk Reduction and Management Center (NDRRMC) gikutlo sa mga taho nga usa ka pamilya ang nahurot og kamatay tungod sa grabeng uwan sa kaulohan.

Ang NDRRMC niingon nga 808, 697 ka mga tawo (179, 026 ka mga pamilya) naa sa mga dapit nga grabe ang baha nga naglakip sa Metro Manila ug mga lalawigan sa Bataan, Bulacan, Cavite, Ilocos, La Union, Laguna ug Pangasinan, Tarlac ug Zambales.

Ning mao nga gidaghanon, sobra sa tunga sa mil­yon ang gihatagan sa nag-unang panginahanglan ug mga serbisyo sa mga evacuation center ug ang uban sa ilang mga kabanay ug higala.

Matod sa NDRRMC nga balor og P13 milyunes nga relief assistance ang nahatag na.

Nihatag og P6.1 milyunes ang Department of Social Welfare and Development, samtang ang local governments ningtampo og P6.2 milyunes ug ang non-governmental organization ning-amot og P654,500.

GISUSPENSO

Mga regional center gimandoan sa paghimog mga lakang sa ilang mga area of responsibility ug pagbakwiton ang mga pamilya nga naa sa low-lying ug bukiran nga mga dapit kon gikinahanglan.

Sayo kagahapon, ang Malacañang niisyu og Memorandum Circular 33-A, nga gipirmahan ni Executive Secretary Paquito Ochoa, nga nagmando sa pagkanselar sa trabaho sa mga pribado ug pampublikong mga buhatan sa National Capital Region (NCR) ug Zambales.

Way puas nga uwan nimugna og landslide nga nipatay og walo ka mga tawo nga nakapa-busy sa mga emergency crew sa kagamhanan sa pagluwas sa liboan ka mga tawo, uban kanila nanungtong sa mga atop sa ilang mga balay.

Daan nang napuno sa tubig ang Metro Manila tungod sa bagyong Gener sa miaging semana.

Nakapatay ang mao nga bagyo og 53 ka mga tawo.

NATABUNAN

Matod sa Pagasa nga laing bagyo sa may silangan sa China ang nakapakusog sa uwan dala sa Habagat ug maoy nakaingon sa uwan nga nagsugod niadto pang Dominggo sa gabii hangtod kagahapon.

Sa Quezon City, usa ka landslide ang niigo sa mga payag daplin sa karsada nga nilubong sa walo ka mga tawo, matod sa mga saksi.

Mga sundawo ug pulis nagtinabangay sa pagdali sa pagkawot aron pagluwas mga nangatabunan, nga naglakip sa upat ka mga bata, samtang mga kabanay ug silingan naghinilakay nga nagtan-aw.

Si PNP Director General Nicanor Bartolome niadto sa dapit ug nimando sa tanang mga lumolupyo sa pagbakwit gikan sa makuyaw nga dapit.

Ang La Mesa dam, nga nag-supply og tubig ngadto sa 12 milyunes ka mga tawo sa kaulohan niawas kagahapon ngadto sa mga sapa sa sa Quezon City ingon man sa mga kasikbit nga dapit sa Malabon, Valenzuela ug Caloocan.

Daghang mga barangay ang gibhaan.

GITAGBO NI PNOY

Sa daplin sa Marikina River, ang kapulisan gipakatap aron pagpabakwit sa 5,000 ka mga tawo palayo daplin sa sapa nga gihulagway ni Vice Mayor Jose Cadiz nga forced evacuation.

Si Presidente Benigno Aquino III nipatawag og emergency meeting sa Kabinete ug disaster-response nga mga ahensya taliwa sa lapad nga pagbaha.

Siya nimando nga kinahanglang seguruon nga luwas ang tanang mga residente sa gibaha nga mga dapit.

Gituki sab niya kon unsaon sa pagtabang ang mga ospital nga naigo sa baha kon dunay brownout. AP/SUNNEX/INTERNET