HUMAN sa sunodsunod nga kapakyasan, ang mata sa yutang Pilipinhon mahipunting karong buntag ngadto sa bugtong na lang paglaom sa nasod nga makaangkon og medalya sa nagpadayon nga London Olympics.

Ang Filipino-American nga si Daniel Caluag mopakita na’g aksiyon sa BMX competition karong alas 3 sa hapon sa London (alas 10 sa gabii sa Pilipinas).

Sa maong event, gibahin ngadto sa upat ka quarterfinals heats ang 32 ka mga riders diin ang top four finishers sa matag heat maoy masulod sa sunod level.

Ang 16 ka mga riders bahinon ngadto sa duha ka semifinal groups diin dinhi kuhaon usab ang top eight nga maoy madala sa finals.

Si Caluag, kinsa anaa sa heat number 3, gituohan nga adunay dakong chance nga masulod sa semifinals. Ang iyang asawa nga si BMX US champion Stephanie Barragan-Caluag, hingpit nga miitsa sa iyang moral support.

Kuyog usab kaniya ang mga advisors nga maoy nagmonitor kon unsay gikinahanglan sa Pinoy rider.