“LET me assure them that they need not worry of these families anymore.”

Mao ni ang gipaneguro ni Gobernador Gwen Garcia ngadto sa mga sakop sa konseho sa dakbayan sa Sugbo labot sa kahimtang sa mga pamilya nga nag-okupar sa mga luna nga gipanag-iya sa lalawigan sa Sugbo nga naa mahimutang dinhi sa siyudad sa Sugbo nga kanhi naila nga 93-1 Provincial Ordinance lots.

Ang gobernador namahayag nga na-appreciate niya ang pagpakabana sa city council sa kaayohan sa 3,000 ka mga pamilya apan alang niya dili na kini angay mabalaka tungod kay duna na sila solusyon sa maong problema.

“We have already found a solution. In fact nakahimo na ta paglagda initially, a number of homeowners association,” asoy ni Garcia atol sa press conference sa Kapitolyo kagahapon.

Alang sa gobernador, walay kapuslanan ang pagtugot nga gihatag sa konseho sa siyudad sa Sugbo ngadto kang Cebu City Mayor Michael Rama nga makigsabot sa Kapitolyo sa posible nga land swap deal.

“So, I guess at this point in time, with all your respect, irrelevant na ang ilang land swap nga offer,” pahayag niya.

Base sa bag-ong resolusyon nga gipanday nila ni Konsehal Nida Cabrera, Alvin Dizon ug Rodrigo Abellanosa, ang upat ka ektarya nga luna nga gipanag-iya sa siyudad sa Block 27 sa North Reclamation Area ang ibaylo niini sa mga luna nga gipanag-iya sa lalawigan nga nahimutang sa 11 ka mga barangay dinhi sa dakbayan.

Si Garcia nipahinumdom sa mga opisyal sa siyudad nga si Bise Presidente Jejomar Binay mianhi mismo sa Sugbo aron pagsaksi sa pinirmahay sa kasabutan tali sa lalawigan ug nagkadaiyang mga homeowners association nga nag-okupar sa mga provincial lots.

Aron dili bug-at alang sa mga pamilya, ang mga ahensiya nga ubos sa Housing and Urban Development Coordinating Council nga gipamunuan ni Binay sama sa Pag-ibig ug Community Mortgage Program maoy mosalo sa bayranan ug ang mga pamilya adto na mobayad sa maong mga ahensiya.

Ang gobernador nidugang nga laing mga homeowners association ang gikatakda nga makigpirmahay og kasabutan tali sa lalawigan nga naglangkob sa 80-85 porsiyento sa mga pamilya nga nag-okupar sa 93-1.

“Meaning to say na-successful package na ang financing for the purchase of the lot. And we expect the others to follow on,” dugang niya.

Si Garcia niingon nga nimando si Binay nga hatagan og espesiyal nga atensiyon sa mga financing institution ang pag-atiman sa mga pamilya ubos sa 93-1.

Sa sayo pa ang gobernador nipasalig nga sa dili pa matapos ang iyang termino sa sunod tuig, masulbad na ang isyu sa 93-1.