SECTIONS
Saturday July 21, 2018
BACOLOD

Editoryal: Managlahing dagway

NIADTONG Hunyo sa miaging tuig, naluwas sa mga awtoridad ang unom ka mga menor, lima niini mga managsuon, nga gipahubo sa ilang mga ginikanan atubangan sa webcam.

Kini bugti sa 25 dolyares nga bayad sa mga langyaw nga customer sa Internet nga gustong motan-aw sa performance.

Niadtong Miyerkules, gidakop sa anti-human trafficking task force ang usa ka inahan ug kapuyo niining langyaw tungod sa giingong pagbugaw sa iyang duha ka dalagitang mga anak, 14 ug 15-anyos.

Nahibaw-an ang gibuhat sa inahan tungod sa pagsumbong sa iyang 14-anyos nga anak sa iyang gibuhat kaniya ug sa iyang maguwang.

Laing makapahinuklog sa iyang giasoy mao ang giingong pagbaligya sa ilang inahan sa iyang duha ka mga igsuon didto sa Leyte.

Pastilan no, kining mga hitaboa nagpakita sa kaubos na lang gyud sa moralidad sa pipila ka mga ginikanan karon kay sila pay misugba ngadto sa kadautan sa ilang kaugalingon nga mga anak.

Klaro kaayo nga ang moralidad gitabunan sa material kaayong panglantaw sa kinabuhi. Gipakabarato na lang kaayo ang kinabuhi.

Kon duna may mga ginikanan nga nagtrabaho isip katabang, namunit og basura ug ang uban milangyaw sa laing nasod aron lang mabuhi ug maharuhay ang mga anak, niay uban nga gigamit ang ilang mga anak aron sila maharuhay.

Duha kini ka managlahing mga dagway sa mga ginikanan ug pagkatawo.


VIEW COMMENTS