GIBATIKOS sa mga sakop sa Victims of Injustice, Criminalities and Terrorism in Mindanao (Victim) ang Karapatan Southern Mindanao Region kagahapon pinaagi sa picket rally nga ilang gihimo atubangan sa buhatan niini didto sa dalang Torres, siyudad sa Davao.
Kauban sa grupo ang suod nga kaparentehan ug pamilya sa mga tribal leaders nga gipamatay sa Communist Party of the Philippines-New People's Army-National Democratic Front (CPP-NPA-NDF) sa siyudad sa Davao ug Arakan Valley, North Cotabato.
Gipatay mao sila Datu Cawsing Ogao ug Datu Abantas Ansabo, alyas Datu Ibon sa duha ka managlahing lugar didto sa Marilog, Davao City ug Arakan, North Cotabato niadtong Hulyo 27.
Ang duha giingon nga sad-an sa mga kasong kriminal nga gipasaka batok kanila base sa nagkadaiyang reklamo mao nga ilang gihukman pinaggi sa ilang People's Court.
Si Victim lead convenor Arthur J. Tariman nagbutyag nga nagprotesta sila kagahapon atubangan sa buhatan sa Karapatan tungod kay buot nilang hagiton ang maong pundok nga hatagan og hustisya ang kamtayon sa mga biktima.
Suma ni Tariman nga angay sundon ang hustong proseso pinaagi sa pagpahibalo sa mga biktima sa ilang sala nga nahimo -- butang nga wa gihimo sa mga rebeldeng NPA.
Buot sa grupo nga molihuk ang Karapatan sa mga insidente nga binuhatan sa NPA.
Gawas niini, nanawagan sab ang Victim ngadto sa gobyerno partikular ang Philippine National Police, Department of Justice, ug Commission on Human Rights nga imbestigahan ang pagpamatay sa mga sakop sa NPA ug silotan ang mga tawo nga nalambigit sa krimen.
Gisuwayan sa SuperBalita pagkuha ang pahayag sa Karapatan kagahapon, apan wa sa ilang buhatan ang ilang mga opisyal nga mamahimong makatubag sa isyu nga gilabay ngadto kanila. (Alger P. Dura)