“DAKO ang posibilidad nga aduna gyuy ma-knockout . Ug dako sab gyud ang akong pagsalig sa akong fighter.”

Kini maoy maisugong giluwatan ni Joseph Balbago, ang trainer ni Ala Boy Jason Pagara atol sa press conference kagahapon sa Café Uno sa Waterfront Hotel-Lahug.

Si Pagara nagtinguha nga makabawos sa iyang pagpakig-rematch sa Mexicanong si Rosbel Montoya ugmang adlawa sa Pinoy Pride XV: Philippines vs. Mexico sa Waterfront Hotel.

Gawas sa pagpanimalos, ning higayona ilogan usab ang bakanting WBO International Jr. welterweight championship.

Subling gipadayag ni Pagara nga sa una nilang away daw sa wa gyud siya sa iyang kaugalingon tungod sa iyang personal nga problema.

Apan karon, iyang gibutyag nga preparado na gyud kaayo siya batok ni Montoya ug nanganti nga kutob sa iyang mahimo iya gyung tumbahon ang Mexicano.

Hinuon si Montoya (36-4-1) bugnawng nanubag sa mga media ug pinaagi sa interpreter siya masaligong nipasumbagay nga kon unsay iyang gihimo sa una nilang away mas grabi

pa unya ang iyang buhaton ugma ni Pagara (28-2, 17).

“I’m stronger for this fight. We are both prepared. Definitely the crowd should expect a better fight,” ingon ni Montoya. “My advantage (in the first fight) was my experience and with it I easily adjusted to his style. His lack of defense was his weakness.”

Laing title fight nga makahatag usab og saktong kulbahinam sa mga Sugboanon mao ang panag-engkuwentro ni undefeated Genesis Servania (18-0, 6 KOs) batok sa Mexicano nga si Jorge Pazos (21-3, 14 KOs).

Awayan sa duha mao usab ang WBO Asia Pacific superbantamweight championship.

Matod ni Servania nga bisan pa man og aduna na siyay nga kasinatian batok sa mga beteranong Mexicano apan wa gyud siyay kompiyansa ning awaya.

Si Pazos sa iyang bahin mipasalig nga malingaw gyud ang mga tawo niini.

“I came here to win and give fans a good fight,” matod ni Pazos.

Sa laing bahin, ang away sa comebacking nga si Jimrex Jaca (34-6-3, 19 KOs) ug Angel Martinez (18-2-1) maoy gituohan nga mahimong sentro sa atraksiyon.

Kahinumdoman nga pinaagis sa website, gipabuhagay ni Martinez nga si Jaca dili angay kahadlokan tungod kay wala kini punching power.

Apan kagahapon, sa dihang nagkahimamat ang duha, daw sa gibakwi sa Mexicano ang iyang gisulti. Ingon niya nga di tinuod ang nigawas sa website ug na-misquoted lang siya. Iyang gipasabot nga dako ang iyang pagrespeto ni Jaca.

Si Jaca way panumbaling sa pagbakwi sa Mexicano. Gusto niya nga adto ibabaw sa ring iyang patagmon ug kulatahon si Martinez.

Niini gitubag usab siya sa Mexicano kinsa nagkanayon pag-ingon “once in the ring, I don’t respect my opponents.”