COTABATO CITY- Himuon nga agricultural zone ang nailog nga kampo sa Bangsamoro Islamic Freedom Movement didto sa Maguindanao.
Kini ang rekomendasyon ni 6th Infantry Division Public Affairs chief, Colonel Prudencio Asto human nailog sa militar ang ikaduha sa pinakadako nga kampo sa BIFM sa Hill 714 ug Hill 216 sa maong probinsiya.
Suma ni Asto nga maayo nga tamnan og rubber tree, mais, palm oil ug uban pa nga high value crops ang maong lugar nga makatabang ngadto sa mga mag-uuma.
Gawas pa niini, nindot sab ang lugar kay tua sa taas sa bungtod ug makita ang nindot nga porma sa Liguasan Marsh.
Kahinumdoman nga atol sa gilusad nga combat operation sa hiniusang puwersa sa 33rd Infantry Battalion, 45th IB ug 68th Infantry Battalion sa Philippine Army ubos sa 601st Brigade niadtong milabay'ng adlaw, nailog ang command ug control point sa BIFM nga usa sa ilang lig-on nga posisyon.
Ang Hill 714 ug Hill 216 maoy gi-puwestuhan sa mga sniper sa BIFM ug gihimo sab kining training ground sa mga kabataan nga Mujahidden.
Sa kasamtangan, target sa nagpadayon nga combat operation sa militar mao ang sentro nga bahin sa Camp Omar nga gitagoan sa grupo ni BIFM Chairman Ustadz Ameril Umbra Kato. (Edgardo Fuerzas)